Sənaye və energetika

Ana səhifə

«LUKoil» şirkəti «Yalama» strukturunda yeni kəşfiyyat quyusu qazmağa başlayıb

04 noyabr 2008 14:46 (UTC +04:00)

Bakı. Vahab Rzayev – APA-Economics. Xəzər Azərbaycan sektorunda yerləşən «Yalama» (D-222) perspektiv strukturunun işlənməsi layihəsində operator rolunda çıxış edən Rusiyanın «LUKoil Overseas Ltd.» şirkəti ikinci kəşfiyyat quyusunun qazılmasına başlayıb. «APA-Economics»in məlumatına görə, bunu Azərbaycan Respublikası Dövlət Neft Şirkətinin (ARDNŞ) birinci virse-prezidenti Xoşbəxt Yusifzadə bildirib.
X.Yusifzadənin sözlərinə görə, quyunun layihə dərinliyi 2650 metrdir və artıq 1 min metrə yaxın dərinlikdə qazma işləri aparılıb. Qazma işləri Heydər Əliyev adına qazma qurğusu vasitəsi ilə aparılır.
X.Yusifzadə qeyd edib ki, quyunun dərinliyinin kiçik olması onunla izah olunur ki, bu dərinlikdə bütün laylar aşkarlanır və həmçinin şirkət vəsaitin xərclənməsinə qənaətlə yanaşır. Əgər gələcəkdə bu quyunun daha da dərinləşdirilməsi zərurəti yaranarsa, bunun üçün btün texniki imkanlar mövcuddur.
Qeyd edək ki, strukturda 4,5 km dərinliyində birinci quyunun qazılması 2006-cı ilin may ayında başa çatdırılıb və nəticədə, karbohidrogen ehtiyatları aşkar olunmayıb.
«Yalama» perspektiv srtukturunun birgə kəşfiyyatı və işlənməsi barədə saziş ARDNŞ (40%) ilə «LUKoil» şirkəti (60%) arasında 1997-ci ilin iyulun 3-də imzalanıb. Sənəd 2007-ci ilin dekabrın 5-də Milli Məclis tərəfindən ratifikasiya olunub. Lakin sonra ARDNŞ layihədəki payından daha 20%-i Rusiya şirkətinə satıb. Həmçinin, saziş sahəsinin 1 287 kv. km-dən 3 037 kv. km-ə qədər genişləndirilməsinə dair razılıq əldə olunub.
«Yalama» strukturu təxminən bərabər hissələrlə Xəzərin Azərbaycan və Rusiya sektorlarında sahildən 30 km aralıqda yerləşir. Bu ərazidə dənizin dərinliyi 80-700 metr dəyişir. Karbohidrogenlərin sənaye ehtiyatlarının aşkarlanması ehtimalı yüksək qiymətləndirilir. Layihənin icrasına nəzərdə tutulan sərmayə qoyuluşunun həcmi 2,5 mlrd. ABŞ dollar təşkil edir.