Sənaye və energetika

Ana səhifə

Azərbaycanda neft şirkətində ixtisarlara başlanılıb

29 dekabr 2008 13:51 (UTC +04:00)

Şirvan. Əlibəy Zeynallı - APA. Azərbaycanın quru sahəsində «Mişovdağ» və «Kəlaməddin» yataqlarının işlənməsi ilə məşğul olan «Karasu Oil» Əməliyyat Şirkətində kütləvi ixtisarlar aparılır. Bu barədə APA-nın Mil-Muğan bürosuna ixtisar olunanların özləri məlumat verib.
İxtisar olunan mühəndis Rahil Xanmirzəyevin sözlərinə görə, qabaqcadan xəbərdarlıq edilmədən və ixtisara görə heç bir kompensasiya ödənilmədən 75 nəfər fəhlə və mühəndis işdən azad edilib. Yaxın günlərdə ixtisarların davam etdiriləcəyi bildirilir. İxtisar olunanlar qeyd edib ki, şirkətdə ixtisarlar hansı meyarlarla aparıldığını onlara izah edən yoxdur və səbəb kimi yalnız neftin ucuzlaşması göstərilir.
Şirkətin təhlükəsizlik üzrə meneceri Əlisəttar Mehrəliyev isə öz növbəsində qeyd edib ki, onun şifahi sorğunu cavablandırmaq fikri yoxdur, yalnız yazılı müraciət olarsa sorğuya cavab veriləcək.
Qeyd edək ki, «Karasu» Əməliyyat Şirkətinin təsisçiləri rolunda Azərbaycan Respublikası Dövlət Neft Şirkəti (15%) və Rusiyanın «Global İnvestment» şirkəti (85%) çıxış edir.
Xatırladaq ki, 1960-70-ci illərdə açılan «Mişovdağ» və «Kəlaməddin» yataqları Bakıdan 120 km cənubda yerləşir, yataqların qalıq ehtiyatları 50 mln. ton təşkil edir. Kontrakt 2000-ci ilin sentyabrın 12-də imzalanıb. Layihənin işlənməsinə yatırılacaq investisiyalar 500 mln. dollar həcmində qiymətləndirilir. Kontraktın müddəti 25 ildir, lakin tərəflərin razılığı ilə bu müddət daha 5 ilə uzadıla bilər. Hazırda «Mişovdağ» yatağında 790 quyu (o cümlədən, 200 neft quyusu), «Kəlaməddin» yatağında isə – 190 quyu mövcuddur.