Sənaye və energetika

Ana səhifə

Xoşbəxt Yusifzadə: «Azərbaycanın «Nabucco» kəmərinin doldurulması üçün kifayət qədər qaz ehtiyatı var»

19 fevral 2009 11:01 (UTC +04:00)

«APA-Economics»in məlumatına görə, bunu Azərbaycan Respublikası Dövlət Neft Şirkətinin (ARDNŞ) birinci vitse-prezidenti Xoşbəxt Yusifzadə bildirib.
X.Yusifzadənin sözlərinə görə, Azərbaycanın təbii qaz ehtiyatları «Nabucco» layihəsində iştirakına imkan yaradır: «Hazırda Azərbaycanın təbii qaz ehtiyatları 2 trln. kubmetrdən artıqdır və bunun 1,2 trln. kubmetri «Şahdəniz» yatağında, 300 mlrd. kubmetri «Azəri-Çıraq-Günəşli» yataqlar blokunda, 500 mlrd. kubmetri isə digər yataqlardadır».
ARDNŞ-in birinci vitse-prezidenti onu da qeyd edib ki, Azərbaycanın bir sıra digər perspektivli yataqları da var və ümumiyyətlə, mövcud qaz ehtiyatları ölkənin «Nabucco» layihəsində iştirakını mümkün edir.
Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.
İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır.
«Nabucco»nun potensial qaz təchizatçıları rolunda Azərbaycan, İran, Türkmənistan və İraqın çıxış edəcəyi gözlənilir.
Xatırladaq ki, bu ilin may ayında «Nabucco» layihəsinin iştirakçı ölkələrinin sammiti keçiriləcək. Sammitdə hökumətlərarası sazişin imzalanması planlaşdırılır.