Sənaye və energetika

Ana səhifə

Şahmar Mövsümov: «Bir çox ölkə Azərbaycanın Mədən Sənayesində Şəffaflıq Təşəbbüsü üzrə təcrübəsindən yararlanmaq istəyir»

26 fevral 2009 14:11 (UTC +04:00)

Bakı. Rəşad Süleymanov – APA-Economics. Azərbaycan Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsünü (MHŞT) tətbiq edən və namizəd statusu almış 26 ölkədən tamhüquqlu üzv statusu almış ilk və yeganə ölkədir. «APA-Economics»in məlumatına görə, bunu Azərbaycanın MHŞT-nin tamhüquqlu üzvü seçilməsinə həsr olunmuş mətbuat konfransında Dövlət Neft Fondunun (ARDNF) icraçı direktoru Şahmar Mövsümov bildirib.
Ş.Mövsümovun sözlərinə görə, fevralın 16-18-də Dohada (Qətər) keçirilmiş 4-cü MHŞT üzrə beynəlxalq konfransda Azərbaycanda mədən hasilatı ilə məşğul olan şirkətlərin hökumətə ödənişləri və hökumətin şirkətlərdən daxilolmaları barədə məlumatların müntəzəm olaraq auditdən keçərək ictimaiyyətə açıqlandığı, həmçinin Azərbaycanın MHŞT prinsip və meyarlarının tam tətbiq edildiyini təsdiqləyən qiymətləndirmə prosesindən keçən ilk ölkə olduğu qeyd edilib. Azərbaycanın namizəd ölkə statusundan tamhüquqlu üzv statusuna keçməsinin təsdiq edilməsinin MHŞT üçün mühüm əhəmiyyət kəsb etdiyi vurğulanıb. Konfransda Azərbaycana MHŞT prinsip və meyarlarına tam cavab verən ölkə olması və MHŞT-nin tətbiqi sahəsində əldə etdiyi nailiyyətlərə görə «2009-cu il MHŞT mükafatı» təqdim edilib.
Konfransda iştirak edən Açıq Cəmiyyət İnstitutu və Soros Fondunun təsisçisi və sədri Corc Soros da Azərbaycanın MHŞT-nin tətbiqində nailiyyətlərini yüksək qiymətləndirərək MHŞT-ni tətbiq edən digər ölkələrin də Azərbaycanın yolu ilə gedəcəyinə ümid etdiyini bildirib.
Konfrans çərçivəsində hər iki ildən bir seçilən MHŞT üzrə Beynəlxalq İdarə Heyətinin üzvlərinin növbəti iki il üçün seçilməsi məsələsi müzakirə edilib və Azərbaycan yenidən MHŞT üzrə Beynəlxalq İdarə Heyətinə üzv seçilib.
«Azərbaycan MHŞT-də daim liderlik edib və bundan sonra öz təcrübəsini digər ölkələrlə bölüşəcək. Eyni zamanda bu prosesi daha da təkmilləşdirəcəyik», - deyə Ş.Mövsümov vurğulayıb.
ARDNF rəsmisinin sözlərinə görə, Qazaxıstan, Monqolustan, Nigeriya, Yəmən və s. ölkələr Azərbaycanın MHŞT təcrübəsi ilə maraqlanır və bu təcrübədən yararlanmaq istəyir.