Sənaye və energetika

Ana səhifə

«Nabucco» layihəsinin icrasına gələn ilin əvvəlində başlanacaq

13 mart 2009 08:16 (UTC +04:00)

Bakı. Rəşad Süleymanov – APA-Economics. «Nabucco» layihəsinin reallaşdırılmasına 2010-cu ilin əvvəlində başlanılacaq. «APA-Economics»in məlumatına görə, bunu Türkiyə KİV-nə müsahibəsində layihənin icrası ilə bağlı yaradılmış «Nabucco Gas Pipeline İnternational GmbH.» beynəlxalq konsorsiumunun direktoru Reynhard Mitçek bildirib.

R.Mitçek yaxın aylarda layihənin reallaşdırılmasına dair hökumətlərarası sazişin imzalanacağını qeyd edib: «Hazırda hökumətlərarası müqavilənin son variantı müzakirə olunur. Hökumətlərarası razılaşma yaxın bir neçə aya imzalanacaq və biz bu il detallı mühəndis işlərinə başlaya biləcəyik. Payız-qış aylarında tikinti müqavilələrini və layihənin maliyyələşdirilməsi məsələlərini müzakirə etməyə başlayacağıq. Hesab edirəm ki, layihənin maliyyələşdirilməsinə dair son qərar 2010-cu ilin əvvəlinə hazır olacaq».

Konsorsium rəhbəri Rusiyanın da «Nabucco» layihəsində iştirakını mümkün sayır: «Nabucco»da iştirak edən şirkətlərin hamısı «Qazprom»la 20, 30, 40 ildir müqavilə əsasında işləyir. Bu əlaqə gələcəkdə də davam edəcək. Bu gün biz Türkmənistan, Azərbaycan, İran, İraq və Misirdən alternativ qaynaqlar istəyirik və hər hansı bir qazı rədd edəcək deyilik. Əgər Rusiya «Nabucco»ya qaz vermək istəsə, bu mümkündür. Biz bununla boru xəttinin gücünü daha da artırmış olacağıq».

ABŞ Dövlət Katibi müavininin köməkçisi Metyu Brayza da Rusiyanın «Nabucco»da iştirakını mümkün sayıb: «Əgər Rusiya şirkətləri «Nabucco»ya qatılmaq istəsələr, onların digər iştirakçı şirkətlər kimi idarə imkanlarına sahib hissələri ola bilməz, amma bərabər ticari haqlara əsaslanan hissə əldə edə bilərlər».

Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildə Avropaya çatdırılması planlaşdırılır.