Sənaye və energetika

Ana səhifə

Azərbaycan sənayesində məhsul istehsalçılarının qiymət indeksi 40,8% azalıb

17 mart 2009 14:36 (UTC +04:00)

Bakı. Vüqar İsrafilov – APA-Economics. Cari ilin yanvar-fevral aylarında Azərbaycan sənayesində ötən ilin müvafiq dövrünə nisbətən məhsul istehsalçılarının qiymət indeksi 40,8% azalıb. Bu barədə «APA-Economics»ə Dövlət Statistika Komitəsindən (DSK) məlumat verilib.
DSK-dan bildirilib ki, təkcə fevral ayında yanvara nisbətən sənaye məhsulları istehsalçılarının qiymət indeksi 0,3% düşüb. Xatırladaq ki, 2008-ci ilin fevral ayında sənaye məhsulları istehsalçılarının qiymət indeksi yanvara nisbətən 0,8% azalsa da, yanvar-fevral aylarında 2007-ci ilin müvafiq dövrünə nisbətən 16,7% artıb. Cari ilin hesabat ayında mədənçıxarma sənayesi üzrə sənaye məhsullarının istehsalçı qiymətləri indeksi əvvəlki aya nisbətən 100,4% təşkil edib. Bu sahədə istehsalçı qiymətləri neft və qaz hasilatı üzrə 0,4%, mədənçıxarma sənayesinin digər sahələri üzrə isə 0,2% bahalaşıb. Fevral ayında emal sənayesi üzrə istehsalçı qiymətləri indeksi 97,9%-ə bərabər olub və bu sahədə metallurgiya sənayesi və hazır metal məmulatların istehsalı üzrə qiymətlər 12,6%, dəri, dəridən məmulatlar və ayaqqabı istehsalı üzrə qiymətlər 8,4%, rezin və plastik kütlə məmulatlarının istehsalı üzrə qiymətlər isə 3,7% ucuzlaşıb. Ay ərzində elektrik enerjisi, qaz və suyun istehsalı və bölüşdürülməsi sahəsində istehsalçı qiymətləri dəyişməz qalıb.
Qeyd edək ki, son bir ildə məhsul istehsalçıları qiymətlərinin ən böyük azalması sənayenin mədənçıxarma sahəsində qeydə alınıb – 56,6%, o cümlədən neft və qaz hasilatında bu enmə 56,9%-ə çatıb.

	2009-cu ilin fevral ayı yanvar ayına nisbətən	2009-cu ilin yanvar-fevralı 2008-ci ilin müvafiq aylarına nisbətən
Sənaye məhsullarının istehsalçı qiymətləri indeksi	99,7	59,2
Mədənçıxarma sənayesi	100,4	43,4
o cümlədən:
neft və qaz hasilatı	100,4	43,1
mədənçıxarma sənayesinin digər sahələri	100,2	106,1
Emal sənayesi	97,9	99,9
o cümlədən:
içki və tütün də daxil olmaqla qida məhsullarının istehsalı	98,2	106,0
toxuculuq və tikiş sənayesi	100,4	105,5
dəri, dəridən məmulatlar və ayaqqabı istehsalı	91,6	105,3
oduncaqların emalı və ağacdan məmulatların istehsalı	99,5	141,9
sellüloz-kağız istehsalı, nəşriyyat işi	98,2	100,9
neft məhsullarının istehsalı	100,0	100,3
kimya sənayesi	99,3	81,1
rezin və plastik kütlə məmulatlarının istehsalı	96,3	118,1
digər qeyri-metal mineral maddələrin istehsalı	99,3	116,1
metallurgiya sənayesi və hazır metal məmulatlarının istehsalı	87,4	92,9
maşın və avadanlıqların istehsalı	99,3	109,1
elektrik avadanlığı, optik və elektron avadanlıqlarının istehsalı	100,7	106,4
nəqliyyat vasitələri və avadanlıqlarının istehsalı	99,7	100,4
emal sənayesinin digər sahələri	103,7	98,2
Elektrik enerjisi, qaz və suyun istehsalı və bölüşdürülməsi	100,0	101,7