Sənaye və energetika

Ana səhifə

Azərbaycan və Rusiya qaz satışına dair danışıqlara rəsmən start verib

30 mart 2009 14:07 (UTC +04:00)

Bakı. Vüqar İsrafilov – APA-Economics. Azərbaycan Respublikası Dövlət Neft Şirkəti (ARDNŞ) ilə Rusiyanın «Qazprom» SC arasında qaz sahəsində danışıqların başlanması haqqında memorandumun imzalanması məsələnin yekun həlli deyil, sadəcə danışıqlara rəsmən start verildiyini göstərir.

ARDNŞ-dən «APA-Economics»ə verilən məlumata əsasən, hər iki qurumun başçıları Rövnəq Abdullayev və Aleksandr Miller arasında ötən həftə Moskvada keçirilən görüş adıçəkilən sənədin imzalanması ilə nəticələnib. Memorandumun imzalanması Rusiya kütləvi informasiya vasitələrində tərəflərin Azərbaycanda hasil olunan qazın RF-yə satılması üzrə razılığa gəlməsi kimi qələmə verilsə də, bu sahədə şirkətlərarası rəsmi danışıqlar yalnız indi başlanır. İlk növbədə «Qazprom» və ARDNŞ «mavi yanacağın» mübadiləsi və satışın səmərəliliyini araşdırmaq fikrindədir. Bundan başqa, tərəflər Bakı - Novo-Fili qaz boru sisteminin texniki cəhətdən yoxlanılması və təkmilləşdirilməsini planlaşdırırlar. Ehtimal olunur ki, bu xətt vasitəsi ilə Azərbaycan qazı Rusiyayə nəql oluna bilər. İmzalanan Memorandum ARDNŞ və «Qazprom»un mütəxəssisləri üçün müştərək tədris proqramları, xüsusi təlim və iş təcrübəsinin artırılması üçün mübadilələrin təşkilini də nəzərdə tutur.

Qeyd etmək lazımdır ki, Rusiyaya satıla biləcək təbii qazın əsas həcmi Xəzərin Azərbaycan sektorunda yerləşən «Şahdəniz» yatağından deyil, ARDNŞ-in neft-qazçıxarma idarələri tərəfindən və «Azəri-Çıraq-Günəşli (dərinsulu)» yataqlar blokunda hasil olan səmt qazı hesabına təmin olunacaq. Bunu Dövlət Neft Şirkətinin prezidenti R.Abdullayev də jurnalistlərə verdiyi açıqlamasında təsdiqləyib. ARDNŞ başçısı bəyan edib ki, Moskvada keçirilən danışıqlarda «Qazprom» İrana qaz vermək marağında olduğunu açıqlayıb, Azərbaycan tərəfi isə «Qazprom»un infrastrukturundan tranzit xətləri kimi istifadə etmək maraqları haqqında məlumat verib. R.Abdullayevin sözlərinə görə, şirkətlərarası memorandum «razılıq deyil, müəyyən maraqlar dairəsidir». «Azərbaycan tərəfinin əsas maraqlarından biri öz qazını yüksək qiymətə satmaqdır və Moskvada keçən görüşlər hər bir marşrut üzrə qaz şirkətləri və dövlətlərlə aparılan danışıqların müəyyən hissəsidir», - deyə ARDNŞ başçısı vurğulayıb. Dövlət Neft Şirkətinin rəhbəri xüsusi ilə qeyd edib ki, «Şahdəniz» qazının ikinci mərhələsi zamanı hasil olunacaq qazın satışı ayrı danışıqların mövzusudur.

Ehtimallara görə, 2010-2011-ci illərdə ARDNŞ üzrə illik qaz hasilatı ən azı 1,5 mlrd. kubmetrin satışa çıxarılmasına imkan verəcək. Qaz ixracında ARDNŞ-in potensialını artıran yataqlar sırasına «Bahar», «Günəşli» (dayaz hissəsi) və «Ümid» daxildir.
Xatırladaq ki, Xəzərdə ən iri qaz-kondensat yatağı sayılan «Şahdəniz» sahəsində kommersiya qazının genişmiqyaslı hasilatı 2012-ci ildən 2014-cü ilədək təxirə salınıb.

Qeyd edək ki, ən son araşdırmalara görə, Azərbaycanın qaz ehtiyatları 1,5 trln. kubmetr həcmində qiymətləndirilir, ölkədə «mavi yanacağın» illik istehlakı isə orta hesabla 13 mlrd. kubmetr təşkil edir.