Sənaye və energetika

Ana səhifə

Azərbaycanın ümumi generasiya gücü 6000 MVt-a çatacaq

17 aprel 2009 11:13 (UTC +04:00)

Bakı. Rəşad Süleymanov – APA-Economics. Yaxın bir neçə il ərzində Azərbaycanın ümumi generasiya gücü 6000 MVt-a çatacaq. «APA-Economisc»in məlumatına görə, bu barədə bu gün Yeni Azərbaycan Partiyasının (YAP) qərargahında keçirdiyi mətbuat konfransında «Azərenerji» ASC-nin prezidenti Etibar Pirverdiyev bildirib.

Ötən il Azərbaycanda bir sıra yeni elektrik stansiyalarının istismara verildiyini deyən «Azərenerji» prezidenti bunların arasında ən böyüyünün 300 MVt gücə malik Səngəçal elektrik stansiyası olduğunu qeyd edib.

«Hazırda Şirvanda 780 MVt gücə malik «Cənub» stansiyasının, Qubada isə 104 MVt gücə malik modul tipli stansiyanın tikintisi davam etdirilir. Sumqayıtdakı 525 MVT gücə malik buxar-qaz qurğusunda isə işlər başa çatıb, hazırda sınaq-sazlama işləri aparılır. Bu qurğu 2009-cu il ərzində şəbəkəyə qoşulacaq», - deyə E. Pirverdiyev vurğulayıb.

«Azərenerji» prezidenti bunlarla yanaşı, «Azərbaycan» İstilik Elektrik Stansiyasında (İES) təmir-yenidənqurma işlərinin, həmçinin ölkədaxili yüksək gərginlikli şəbəkədə təmir-yenidənqurma işlərinin və sayğaclaşdırmanın aparıldığını diqqətə çatdırıb. Artıq «Azərbaycan» İES-in 4 saylı blokunda təmir işləri başa çatdırılıb. Stansiyanın bloklarında aparılan işlər nəticəsində hər bir blokun gücü mövcud 250-280 MVt-dan 400 MVT-a çatdırılacaq. Hazırda Goranboy-İmişli yüksək gərginlikli xəttinin tikintisinə başlanıb, 1 və 2-ci Mingəçevir xətləri yenidən qurulacaq.

E. Pirverdiyev Gəncədə kartlı sayğaclaşdırma işlərinin başa çatdırıldığını, Mingəçevir şəhərində isə işlərin yekunlaşmaq üzrə olduğunu bildirib. «Azərenerji» rəhbəri hazırda Şirvan şəhəri, Sabirabad, Hacıqabul, Yevlax və Şəmkirdə smart-kartlı sayğacların quraşdırılması işlərinin aparıldığını qeyd edib.