Sənaye və energetika

Ana səhifə

«Enerji Körpüsü» layihəsi reallaşandan sonra Azərbaycan Türkiyəyə 450 MVt elektrik enerjisi ixrac edəcək

17 aprel 2009 11:36 (UTC +04:00)

Bakı. Rəşad Süleymanov – APA-Economics. Azərbaycan və Gürcüstan arasında «Enerji Körpüsü» (Power Bridge) layihəsi reallaşdırıldıqdan sonra Azərbaycan Türkiyəyə 450 MVt , Gürcüstana isə 150 MVt elektrik enerjisi ixrac edə biləcək. «APA-Economics»in məlumatına görə, bu barədə «Azərenerji» ASC-nin prezidenti Etibar Pirverdiyev bildirib.

E. Pirverdiyevin sözlərinə görə, bu layihə uzun müddətdir müzakirə olunub, ayrı-ayrı dövrlərdə 3 beynəlxalq təşkilat tərəfindən layihənin texniki-iqtisadi əsaslandırılması hazırlanıb.

«Bu layihə iqtisadi cəhətdən olduqca səmərəlidir. Bu reallaşandan sonra Azərbaycan Türkiyəyə enerji ixracını həyata keçirməyə nail olacaq. Türkiyənin bu enerji gücünə ehtiyacı var», - deyə E.Pirverdiyev qeyd edib.

E. Pirverdiyevin sözlərinə görə, sovet dövründə Azərbaycanla Gürcüstan arasında 500 KV-luq yüksək gərginlikli elektrik verilişi xətti mövcud olub. Lakin 1992-ci ildə bu xətt dağıdılıb. Layihəyə əsasən, «Azərbaycan» İstilik Elektrik Stansiyası ilə Gürcüstanın 500 KV-luq yarımstansiyasını birləşdirən xətt tikilməlidir: «Türkiyə ərazisində 500 KV-luq xətlər olmadığından Gürcüstanda bəzi texniki tədbirlər həyata keçirməklə elektrik enerjisi bu ölkəyə nəql olunacaq. Bu Gürcüstan enerji sistemi üçün də böyük əhəmiyyətə malikdir».

Qeyd edək ki, Azərbaycan, Gürcüstan və Türkiyə arasında elektrik şəbəkələrinin birləşdirilməsini nəzərdə tutan «Enerji Körpüsü» (Power Bridge) layihəsinin reallaşdırılmasına dair memorandum aprelin 5-də imzalanıb. Layihə çərçivəsində Gürcüstan, Azərbaycan və Türkiyə birlikdə yüksək gərginlikli şəbəkənin vahid regional modelini formalaşdıracaqlar. Bununla bərabər, yaradılacaq İşçi Qrupu hər bir ölkədə şəbəkələrin cari vəziyyətini təhlil edib və modelin reallaşdırılması perspektivləri baxımından lazımi investisiyanı dəqiqləşdirəcək.