Sənaye və energetika

Ana səhifə

«Nabucco» layihəsinin iştirakçısı Türkmənistanla qaz sazişi imzalayıb

20 aprel 2009 11:06 (UTC +04:00)

Bakı. Elmin İbrahimov – APA-Economics. Almaniyanın RWE enerji şirkəti ilə Türkmənistan hökuməti arasında Xəzərin şelfində yerləşən 23-cü qaz blokunun işlənməsi və Avropaya türkmən qazının ixracının yeni yollarının axtarılmasını nəzərdə tutan əməkdaşlıq memorandumu imzalayıb. Sənədi Aşqabadda keçirilən tədbirdə Türkmənistan Karbohidrogen Resurslarının İdarə Edilməsi və İstismarı üzrə Dövlət Agentliyinin sədri Yağışgəldi Kakayev və RWE-nin baş icraçı direktoru Yurgen Qrosman imzalayıblar.

«APA-Economics»in BNE portalına istinadən (www.businessneweurope.eu) verdiyi xəbərə görə, RWE-nin açıqladığı məlumata əsasən, bu saziş enerji sektorunun müxtəlif sahələrində tərəflər arasında uzunmüddətli əməkdaşlığın yaradılmasını nəzərdə tutur.

«Bu, Türkmənistanın ixrac portfelinin daha da diversifikasiya olunmasını, Almaniya və Avropanın qaz resursları ilə təhlükəsiz təmin edilməsini yaxşılaşdıracaq», - deyə Y.Grosman deyib.

Maraqlıdır ki, bu sənəd «Qazprom»un Türkmənistandan qazın idxalını azaltmasından dərhal sonra imzalanıb.

RWE şirkəti Avropaya Rusiyadan yan keçməklə qaz nəqlini nəzərdə tutan «Nabucco» qaz kəmərinin inşası layihəsinin icrasını həyata keçirmək məqsədi ilə yaradılan beynəlxalq konsorsiumun əsas tərəfdaşlarından biridir.

Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir.

Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub və gələcəkdə 40 mlrd. Kubmetrədək artırıla bilər. Son planlaşdırmaya görə, layihə çərçivəsində ilk qazın artıq 2013-cü ildən sonra Avropaya çatdırılacağı gözlənilir.