Sənaye və energetika

Ana səhifə

«Azərbaycan» İstilik Elektrik Stansiyası martda proqnozdan artıq elektrik enerjisi istehsal edib

21 aprel 2009 12:52 (UTC +04:00)

Bakı. Rəşad Süleymanov – APA-Economics. Cari ilin mart ayında «Azərbaycan» İstilik Elektrik Stansiyasında (İES) 831 mln. kVt/saatdan artıq elektrik enerjisi istehsal edilib ki, bu da müvafiq aylıq proqnozdan 0,7% çoxdur. Bu barədə «APA-Economics»ə «Azərenerji» ASC-nin mətbuat xidmətindən məlumat verilib.
Cari ilin yanvar-mart aylarında isə stansiyada 2,7 mlrd. kVt/saata yaxın elektrik enerjisi istehsal edilib ki, bu da rüblük proqnozdan 1,8% çox olub.
Mətbuat xidmətindən verilən məlumata görə, yaxın vaxtlarda İES-in 4 saylı blokunda aparılan yenidənqurma işləri başa çatdırılacaq. Təmir işləri başa çatandan sonra stansiyanın istehsal gücü artacaq.
Qeyd edək ki, elektrik stansiyası hər birinin gücü 300 MVt olan 8 enerji blokundan ibarətdir. Daxili imkanlar hesabına 5-ci enerji blokunda aparılmış yenidənqurma işləri nəticəsində blokun gücü 330 MVt-a artırılıb. Digər 7 blokun yenidən qurulması layihəsi üzrə işlər plana uyğun davam etdirilir. Blokların tamamilə yenidən qurulması nəticəsində energetika sistemi 600 MVt-dan artıq əlavə güc əldə edəcək.
«Azərbaycan» İES hazırda Azərbaycanda elektrik enerjisinin 45%-ni istehsal edir.