Sənaye və energetika

Ana səhifə

Rusiya Dövlət Dumasının sədr müavini: «Cənub axını» layihəsinin icrası şansı «Nabucco»dan daha yüksəkdir»

21 aprel 2009 15:13 (UTC +04:00)

Bunu APA-nın müxbirinin sualını Moskvada keçirilən mətbuat konfransında cavablandıran Rusiya Dövlət Dumasının sədr müavini və Rusiya Qaz Cəmiyyətinin prezidenti Valeri Yazev bildirib.
V.Yazevin sözlərinə görə, yeni kəmərlər Ukraynanın inhisarçılığını aradan qaldıracaq, eyni zamanda meydana yeni inhisarçı ölkə – Türkiyə gəlir. Belə ki, «Nabucco» məhz Türkiyə ərazisindən keçəcək. V.Yazev onu da bildirib ki, «Nabucco» kəməri olmadığı halda Türkiyə artıq siyasi şərtlərlə (Avropa İttifaqına daxil olmaq) çıxış edir.
Maliyyələşdirmə məsələlərinə gəldikdə isə V.Yazev vurğulayıb ki, «Cənub axını» layihəsini Rusiyanın «Qazprom» və İtaliyanın «Eni» şirkətləri maliyyələşdirəcək: «Artıq hər iki şirkət arasında saziş imzalanıb və maliyyələşdirmənin nə cür aparılacağı müəyyənləşdirilib».
V.Yazevin sözlərinə görə, «Nabucco» kəmərinin inşası üçün 500 mln. ABŞ dolları həcmində vəsaitin ayrılmasına dair söhbət getdiyi halda, «Cənub axını» layihəsinin icrasına Avropa tərəfindən heç bir vəsait ayrılmayacaq.
«Cənub axını» kəməri ildə 45 mlrd. kubmetr qaz ötürmək imkanına malik olacaq və artıq layihənin xammal bazası məsələləri həll olunub. «Nabucco» üzrə isə həll olunmayıb. Həmçinin, «Nabucco» ilkin olaraq 8-10 mlrd. kubmetr qaz ötürmək imkanına malik olacaq, 5 ildən sonra isə 15 mlrd. kubmetr və yalnız uzunmüddətli perspektivdə maksimal ötürmə gücünə - 30 mlrd. kubmetr həddinə çıxacaq», - deyə V.Yazev bildirib.
Bundan başqa, Dövlət Dumasının sədr müavini qeyd edib ki, «Cənub axını» layihəsinin icra olunmaq şansı «Nabucco» ilə müqayisədə daha yüksəkdir. Belə ki, «Nabucco» hələ «Şimal axını»nda olduğu analoji statusu almayıb.
V.Yazevin sözlərinə görə, Xəzəryanı ölkələrdən heç biri Rusiyanın «Qazprom» şirkəti ilə rəqabət apara bilməz: «Türkmənistanın qaz ixracının həcmi 70 mlrd. kubmetr olduğu halda, biz 650 mlrd. kubmetr qaz hasil edirik. Azərbaycanda isə bu göstərici daha azdır – 8-12 mlrd. kubmetr təşkil edir. «Nabucco» layihəsi icra olunsa belə, o, Rusiyanın layihələri ilə rəqabət apara bilməz. Çünki bu layihə sırf siyasi xarakterlidir».
V.Yazev onu da vurğulayıb ki, Azərbaycanın öz qazının Rusiyaya satmaqdan başqa daha əlverişli variantı yoxdur. Belə ki, Azərbaycanın nə alternativ bazarları var, ixrac qazının nəqletmə sistemi isə Rusiyaya istiqamətlənib.
Duma rəsmisi sonda bildirib ki, «Nabucco» layihəsinin mənfi tərəfləri mövcuddur: «Mənfi tərəflər kəmərin xammal bazası ilə təmin olunmaması və bu kəmərin siyasi cəhətdən qeyri-stabil ölkələrdən keçməsi ilə bağlıdır. Buna baxmayaraq, bu layihə həm aprelin 23-də Aşqabadda, həm də aprelin 24-25-də Sofiyada ciddi şəkildə müzakirə olunacaq. Lakin bu görüşlərin heç birində «Nabucco» üzrə konkret qərarın qəbul edilməsini gözləməyə dəyməz».