Sənaye və energetika

Ana səhifə

Azərbaycan İstanbulda IX Beynəlxalq Müdafiə Sənayesi Sərgisində iştirak edəcək

24 aprel 2009 12:19 (UTC +04:00)

Bakı. Rəşad Süleymanov – APA-Economics. Azərbaycan Müdafiə Sənayesi Nazirliyinin (MSN) müəssisələrində istehsal olunan məmulatlar ilk dəfə olaraq IX Beynəlxalq Müdafiə Sənayesi Sərgisində (IDEF-2009) nümayiş etdiriləcək. Bu barədə «APA-Economics»ə MSN-in mətbuat xidmətindən məlumat verilib.
Aprelin 27-dən 30-dək Türkiyə Milli Müdafiə Nazirliyinin təşkilatçılığı ilə İstanbul şəhərində keçiriləcək tədbirə Azərbaycandan müdafiə sənayesi naziri Yavər Camalovun başçılıq etdiyi geniş tərkibli nümayəndə heyəti qatılacaq.
Sərgidə Müdafiə Sənayesi Nazirliyinin müəssisələrində yaradılan və istehsal olunan müdafiə təyinatlı məmulatlar da nümayiş etdiriləcək. Onların arasında döyüş sursatları, atıcı silahlar və optik cihazlar var.
Qeyd edək ki, ilk nümayişi 1993-cü ildə həyata keçirilən, Avropada 10 ən iri müdafiə sərgilərindən sayılan IDEF-də müxtəlif ölkələrdən 463 şirkətin iştirakı nəzərdə tutulur. İki ildən bir keçirilən sərgi, müasir tələblərə cavab verən yeni məmulatların nümayişi ilə yanaşı, onların satışı və alınmasına dair müvafiq kontraktların bağlanması üçün də şərait yaradır. Bu sərgi, müstəqillik dövründə Azərbaycanın müdafiə sənayesi sahəsində təmsil olunduğu ilk beynəlxalq əhəmiyyətli sərgidir.