Sənaye və energetika

Ana səhifə

«Nabucco» layihəsi ilə bağlı Avropa İnvestisiya Bankı və Avropa Yenidənqurma və İnkişaf Bankı ilə danışıqlara başlayıb

22 oktyabr 2009 14:02 (UTC +04:00)

Bakı. Rəşad Süleymanov – APA-Economics. «Nabucco Gas Pipeline International» şirkəti Avropa İnvestisiya Bankı (AİB) və Avropa Yenidənqurma və İnkişaf Bankı (AYİB) ilə danışıqlara başlayıb. Bu barədə «APA-Economics»ə şirkətin Azərbaycandakı nümayəndəliyindən «Nabucco» şirkətinin icraçı direktoru Reynhard Mitçekə istinadən məlumat verilib.

R.Mitçek bildirib ki, yaxın vaxtlarda Beynəlxalq Maliyyə Korporasiyası (BMK) ilə də müzakirələrin başlanması planlaşdırılır. Danışıqlar əsas maliyyə parametrlərini müəyyənləşdirməyə yönəlib. Cari danışıqların ən əsas məqsədi layihənin ekoloji və sosial təsirinin qiymətləndirilməsi haqqında kreditorları məlumatlandırmaq və bu işlərin kreditorların tələblərinə müvafiq olaraq yerinə yetirildiyinə zəmanət verməkdir.

Ümumi dəyəri 7,9 mlrd. avro olan «Nabucco» layihəsi üçün beynəlxalq maliyyə, kredit təşkilatları və kommersiya banklarından ibarət müxtəlif kreditorlara ehtiyac duyulacağını deyən R.Mitçek bildirib ki, Avropa Yenidənqurma Enerji Proqramının maliyyə dəstəyi (AYİP) layihənin tam şəkildə maliyyələşdirməsini təmin etmək nəzərdə tutulur. Bundan əlavə, fərdi kapital altı konsorsium tərəfdaşı tərəfindən təmin ediləcək.

«Ümid edirik ki, gələn il fərdi kreditorların cəlb olunma imkanları müəyyən olacaq. Kreditorların erkən cəlb olunması layihənin reallaşması üçün vacib amildir», - deyən R.Mitçek bu məqsədlə «Nabucco» şirkətinin istiqraz təminatı və zəmanətlər vasitəsi ilə layihəni dəstəkləmələri gözlənilən Avropa, ABŞ və Yaponiyada bir neçə maliyyə institutu ilə əlaqə yaratdığını vurğulayıb.

Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır.