Sənaye və energetika

Ana səhifə

Yunanıstan Alternativ və Bərpa Olunan Enerjidən İstifadə üzrə Milli Agentliyi Azərbaycanda pilot layihə həyata keçirəcək

29 oktyabr 2009 14:17 (UTC +04:00)

Bakı. Rəşad Süleymanov – APA-Economics. Sənaye və energetika nazirinin müavini Gülməmməd Cavadov Yunanıstanın Azərbaycandakı səfiri Toannis Metaksasla görüşüb. Bu barədə «APA-Economics»ə Sənaye və Energetika Nazirliyinin mətbuat xidmətindən məlumat verilib.

Görüşdə Azərbaycan və Yunanıstan arasında Hökumətlərarası Komitəsinin 2010-cu ildə keçiriləcək iclasında müzakirəyə çıxarılacaq məsələlər ətrafında fikir mübadiləsi aparılıb.

Nazir müavini Gülməmməd Cavadov ölkələr arasındakı əməkdaşlığa toxunaraq bildirib ki, Azərbaycanla Yunanıstan arasında siyasi, iqtisadi, humanitar və digər sahələrdə münasibətlər uğurla inkişaf edir. Nazir müavini qeyd edib ki, ölkələr arasında əlaqələrin yüksək səviyyəyə çatmasında bu cür görüşlərin əhəmiyyəti böyükdür.

Səfir T.Metaksas isə öz növbəsində qeyd edib ki, Yunanıstan xaricdə bir sıra investisiya layihəsi həyata keçirir və bu layihələrə yatırılan sərmayənin ümumi həcmi 20 mlrd. dollardan artıqdır. Ölkəsinin Azərbaycan iqtisadiyyatının bir sıra sahələrinə investisiya qoymaq planlarından danışan səfir bu sahədə hər iki ölkənin sahibkarları arasında əlaqələrin inkişaf etdirilməsinin zəruriliyini də vurğulayıb. Səfir Yunanıstandakı konsaltinq şirkətlərinin Azərbaycanla daha sıx əlaqələri üçün geniş imkanlar mövcudluğunu da diqqətə çatdırıb.

Görüşdə bir sıra konkret təkliflər də diqqətdən keçirilib. Səfir bildirib ki, Yunanıstan alternativ və bərpa olunan enerji mənbələrindən istifadə üzrə zəngin təcrübəyə malikdir və bu sahədə öz nailiyyətlərini Azərbaycanla bölüşməyə hazırdır.

T.Metaksas Yunanıstan Alternativ və Bərpa Olunan Enerjidən İstifadə üzrə Milli Agentliyin beynəlxalq departamentinin rəhbərinin Bakıya səfər edəcəyini qeyd edib. Səfər çərçivəsində Azərbaycanla bu sahədə pilot layihənin həyata keçirilməsi üçün anlaşmanın əldə olunması gözlənilir.