Sənaye və energetika

Ana səhifə

Azərbaycan Dövlət Neft Şirkəti ilin sonunadək «Neft Daşları»nda qaz hasilatını 9% artıracaq

03 noyabr 2009 14:43 (UTC +04:00)

Bakı. Rəşad Süleymanov – APA-Economics. Bu ilin sonunadək Azərbaycan Respublikası Dövlət Neft Şirkəti (ARDNŞ) «Neft Daşları» NQÇİ-nin sutkalıq təbii qaz hasilatının həcmini 8,7% artıracaq. «APA-Economics»in məlumatına görə, bunu «Neft Daşları» NQÇİ-nin rəisinin ümumi işlər üzrə müavini Mətləb Bağırov bildirib.

Onun sözlərinə görə, hazırda «Neft Daşları»nda sutkalıq neft hasilatı 2 420 ton planlaşdırıldığı halda 2 480 ton təşkil edir: «Sutkalıq qaz hasilatı isə 930 mln. kubmetr təşkil edir ki, cari ilin sonunadək bu rəqəmin 1 mln. tona çatdırılacağı gözlənilir».

Hazırda «Neft Daşları»nda estakadada işlək yollarının uzunluğu 43 km təşkil etdiyini bildirən M.Bağırov həmçinin qeyd edib ki, əvvəllər bu yolların uzunluğu 300 km təşkil edirdi. Lakin estakadalar istismara yararsız hala düşdüyünə görə sökülüb.

Qeyd edək ki, «Neft Daşları» yatağının 60 illik yubileyi ilə əlaqədar ARDNŞ bir qrup jurnalistin sözügedən yatağa səfərini təşkil edib. Belə ki, jurnalistlərə yataqda həyata keçirilən işlər barədə ətraflı məlumat verili, burada yaşayan neftçilərin yataqxanası və ümumi şəraiti ilə tanışlıq ekskursiya keçirilib. Bununla yanaşı, «Neft Daşları» yatağının 60 illik yubileyi ilə əlaqədar burada stadion, park, Heydər Əliyev muzeyi inşa olunub, həmçinin yataqxanalar əsaslı təmir olunub. Hazırda «Neft Daşları» qəsəbəsində 7 yaşayış binasının 1 440 mənzilində 1 200-dən artıq ailə yaşayır.