Sənaye və energetika

Ana səhifə

Bu ilin oktyabr ayında BTC kəməri vasitəsilə 3,2 mln. ton Azərbaycan nefti nəql olunub

10 noyabr 2009 15:42 (UTC +04:00)

Bakı. Rəşad Süleymanov – APA-Economics. Cari ilin oktyabr ayı ərzində Bakı-Tiflis-Ceyhan (BTC) əsas ixrac boru kəməri vasitəsilə 3,2 mln. ton Azərbaycan nefti nəql olunub. Bu barədə «APA-Economics»ə ARDNŞ-dən məlumat verilib.

Cari ilin yanvar-oktyabr aylarında bu kəmərlə 30,5 mln. ton neft ötürülüb. Ümumiyyətlə, kəmər istifadəyə verilən gündən (2006-cı ilin iyun ayı) 2009-cu ilin noyabr ayının 1-nə qədər BTC-yə 100,8 mln. ton neft vurulub. Bundan əlavə, 2009-cu ilin oktyabr ayında BTC kəməri vasitəsilə 187,3 min ton Qazaxıstan nefti ötürülüb. Noyabr ayının 1-nə kimi isə kəmərlə nəql olunan qazax neftinin ümumi həcmi təxminən 1,9 mln. ton təşkil edib.

ARDNŞ-dən o da bildirilib ki, oktyabr ayı ərzində 3,3 mln. ton Azərbaycan nefti Ceyhan limanından dünya bazarlarına çıxarılıb. Cari ilin yanvar-oktyabr aylarında isə bu göstərici 30,7 mln. ton təşkil edib. Ümumiyyətlə, BTC istismara verilən gündən 2009-cu ilin noyabr ayının 1-nə qədər Ceyhan limanından 99,05 mln. ton Azərbaycan nefti dünya bazarlarına yola salınıb.