Sənaye və energetika

Ana səhifə

«Şahdağ» elektrik stansiyasında 30 mln. kVt/saata yaxın elektrik enerjisi istehsal edilib

24 noyabr 2009 11:18 (UTC +04:00)

Bakı. Rəşad Süleymanov – APA-Economics. Azərbaycanın şimal regionunda ən böyük elektrik stansiyası olan «Şahdağ» elektrik stansiyasında enerji obyekti istismara verildiyi tarixdən cari ilin noyabr ayının 10-dək 30 mln. kVt/saata yaxın elektrik enerjisi istehsal edilib. Bu barədə «APA-Economics»ə «Azərenerji» ASC-dən məlumat verilib.

Müasir avadanlıqların quraşdırıldığı bu 105 MVt-lıq elektrik stansiyasında oktyabr ayında 16 mln. kVt/saatdan artıq elektrik enerjisi istehsal edilib. Gün ərzində stansiyada orta hesabla 500-600 min kVt/saat elektrik enerjisi istehsal edilir.

Stansiya Şahdağ Qış-Yay Turizm Kompleksinin elektrik enerjisi təchizatını təmin edəcək. Həmçinin Quba və Qusar rayonlarına elektrik enerjisinin bir hissəsi bu stansiyadan ötürülür.

Xatırladaq ki, hər birinin gücü 8,7 MVt olan 12 ədəd porşen tipli aqreqatdan ibarət olan “Şahdağ” elektrik stansiyasının tikintisinə 2008-ci ilin aprel ayında başlanıb və cari ilin sentyabr ayında istismara verilib. Elektrik stansiyasında istehsal olunan elektrik enerjisinin enerjisistemə ötürülməsi üçün 110 KV-luq II Quba hava xəttinin stansiyaya giriş-çıxışının təmin edilməsi məqsədilə 2 kilometr uzunluğunda yeni xətt çəkilib.