Sənaye və energetika

Ana səhifə

«Azərenerji»nin istilik elektrik stansiyaları mazut israfını 70% azaldıb

24 noyabr 2009 14:18 (UTC +04:00)

Bakı. Nicat Mustafayev – APA-Economics. Bu ilin yanvar-sentyabr aylarında «Azərenerji» ASC-nin istilik elektrik stansiyaları tərəfindən 3 396,1 mln. kubmetr təbii qaz və 129,7 min ton mazut yanacağı sərf edilib ki, ötən ilin müvafiq dövrü ilə müqayisədə təbii qazın istifadəsi 4,5%, mazut istifadəsi isə 69,8% azalıb.

Dövlət Statistika Komitəsindən «APA-Economics»ə verilən məlumata görə, 2008-ci ilin müvafiq dövrü ilə müqayisədə elektrik enerjisinin bir kVt/saatının istehsalına şərti yanacaq məsrəfi 3,5%, bir Qkal istilik enerjisinin istehsalına isə şərti yanacaq məsrəfi 1,9% azalaraq müvafiq olaraq 336 qram və 198,4 kq təşkil edib. Cari ilin yanvar-sentyabr aylarında istehlakçılara 10,4 mlrd. kVt/saat elektrik enerjisi və 237,5 min Qkal istilik enerjisi verilib.

Bundan başqa, 2009-cu ilin yanvar-sentyabr aylarında büdcədən maliyyələşdirilən idarə, müəssisə və təşkilatlar tərəfindən 1 145,9 mln. kVt/saat elektrik enerjisi, 76,2 min Qkal istilik enerjisi, 69,2 mln. kubmetr təbii qaz, 23 mln. kubmetr su, 4,7 mln. manatlıq rabitə xidməti istehlak edilib. Ötən ilin eyni dövrü ilə müqayisədə elektrik enerjisinin istehlakı 7,2%, təbii qazın istehlakı 3,7%, suyun istehlakı 2,7% artıb, istilik enerjisinin və rabitə xidmətilərinin istehlakı müvafiq olaraq 8,7% və 2,1% azalıb. İstifadə edilmiş elektrik və istilik enerjisinin, təbii qazın, suyun və rabitə xidmətlərinin ümumi dəyəri 5,5% artaraq 95,5 mln. manata çatıb.

İstehlakın ümumi dəyərində elektrik enerjisinin payı 72%, su 14,3%, təbii qaz 7,2%, rabitə xidmətləri 4,9%, istilik enerjisi isə 1,6% olub.

Büdcə təşkilatları istifadə etdikləri ehtiyatların dəyərinin 92,7%-ni ödəyərək 7 mln. manatını kəsirdə qoyub. İstehlak edilmiş elektrik enerjisinin 4,6 mln. manatı (6,7%), istilik enerjisinin 224,6 min manatı (15,2%), təbii qazın 1,5 mln. manatı (21,7%), suyun 566,3 min manatı (4,1%), rabitə xidmətlərinin isə 57,9 min manatı (2,3%) ödənilməyib.