Sənaye və energetika

Ana səhifə

«Azəriqaz» qaz təchizatı sistemində təhlükəsizlik qaydalarına əməl edilməsinə nəzarətin gücləndirilməsi ilə bağlı toplantı keçirib

24 noyabr 2009 15:15 (UTC +04:00)

Bakı. Rəşad Süleymanov - APA-Economics. «Azəriqaz» İstehsalat Birliyi qaz təchizatı sistemində təhlükəsizlik qaydalarına əməl edilməsinə nəzarətin gücləndirilməsi məqsədilə Bakı şəhər Nəsimi və Nərimanov rayonları Qaz İstismar Sahələrinin işçilərinin iştirakı ilə toplantı keçirib. Bu barədə «APA-Economics»ə ARDNŞ-dən məlumat verilib.

“Azəriqaz” İB-nin baş direktorunun birinci müavini Nazim Səmədzadə qış rejiminə keçidlə əlaqədar qaz təchizatı sistemində görülən tədbirlər haqda məlumat verib. O bildirib ki, görülən tədbirlərə baxmayaraq, yerlərdə təbii qazdan istifadə qaydalarının pozulması hallarına da yol verilir.

N.Səmədzadə onu da qeyd edib ki, «Azəriqaz» İB tərəfindən təhlükəsizlik qaydalarının gücləndirilməsi haqqında “Tədbirlər Proqramı” hazırlanıb və bu proqram bütün qaz istismar sahələrinə göndərilib.

«Azəriqaz» İB-in Təhlükəsizlik, ekologiya və keyfiyyətə nəzarət şöbəsinin rəis müavini Kamal Tarverdiyev isə bildirib ki, sözügedən proqrama əsasən, Qaz İstismar Sahələri işçiləri yaşayış evlərində və ictimai binalarda qaz avadanlıqlarına texniki baxış və xidmət aparmalıdırlar. Bundan başqa, qaz təchizatının təhlükəsiz istismar edilməsi məqsədilə respublika ərazisində qüvvədə olan direktiv qaydalara və “Yaşayış evlərində və ictimai binalarda daxili qaz avadanlıqlarına texniki baxış və xidmətlərin aparılması üzrə” Təlimata əsasən, nəzarət gücləndirilmiş iş rejimində həyata keçirilməlidir.

Tədbirdə o da qeyd olunub ki, baş vermiş bədbəxt hadisələr vətəndaşlar tərəfindən mənzillərdə yenidənqurma işləri aparılarkən daxili qaz xətlərinə müdaxilə edilməsi, qaz xətlərinin mətbəx otaqlarından eyvanlara çəkilməsi, qeyri-qanuni cihazlardan istifadə olunması ilə bilavasitə bağlıdır. Yaranmış vəziyyəti dəyişmək üçün qazdan istifadə zamanı təhlükəsizlik qaydalarına riayət olunmaması halları aşkar olunduqda, pozuntuların dərhal sənədləşdirilməsi, tədbir görülməsi üçün müvafiq inzibati və hüquq-mühafizə orqanlarına rəsmi müraciət edilməsi və qaz təchizatının dayandırılması tapşırılıb.