Sənaye və energetika

Ana səhifə

«Azəri-Çıraq-Günəşli» yataqlar blokunda yeni platforma inşa olunacaq

02 dekabr 2009 14:18 (UTC +04:00)

Bakı. Nicat Mustafayev – APA-Economics. Bu gün Bakıda «BP-Azerbaijan» şirkəti Xəzərin Azərbaycan sektorunda yerləşən «Azəri-Çıraq-Günəşli» (AÇG) layihəsi çərçivəsində Çıraq Neft Layihəsinin (ÇNL) təqdimatını keçirib.

«APA-Economics»in məlumatına görə, tədbirin açılış mərasimində çıxış edən «BP-Azerbaijan» şirkətinin ətraf mühit şöbəsinin meneceri Faiq Əsgərov Azərbaycanın neft-qaz sahəsinin inkişaf tarixindən danışaraq qeyd edib ki, son 5 il ərzində bu sahədə bir çox irəliləyişə nail olunub ki, hazırda ölkədə illik neft hasilatı 35 mln. tona bərabərdir: «Gələcəkdə ÇNL və «Şəhdəniz»in II fazasının işə düşməsindən sonra Azərbaycanda neft-qaz hasilatı bir qədər də artacaq».

Daha sonra ÇNL-in təqdimatını keçirən «BP-Azerbaijan» şirkətinin dəniz qurğuları üzrə layihə direktoru İlqar Məmmədov qeyd edib ki, layihə çərçivəsində Xəzər dənizində yeni platforma inşa olunacaq və bu platformadan bir sıra sualtı borular çəkiləcək: «Bu AÇQ-yə birləşən yeni bir layihədir ki, burada dənizin 170 metr dərinliyində «Qərbi Çıraq» platforması tikiləcək, həmçinin yeni hasilat obyektlərinin quraşdırılması və yeni quyuların qazılması nəzərdə tutulub».

İ.Məmmədovun sözlərinə görə, artıq cari ilin dekabr ayında platforma üçün dayaq plitəsinin tikintisinə başlanacaq, gələn ilin ortalarında isə sözügedən plitənin quraşdırılması nəzərdə tutulub, platformanın üst işləri isə 2013-cü ildə realizə olunacaq: «Ümumiyyətlə, platforma 2013-cü ildə hazır olacaq ki, buradan ilk neftin hasili 2013-cü ilin IV rübünə nəzərdə tutulub. Platformanın inşasına dair sanksiya gələn ilin ilk rübündə veriləcək».

ÇNL-in səviyyəsindən məlumat verən İ.Məmmədov onu da bildirib ki, platforma işə düşəndən sonra buradakı gündəlik neft hasilatı 183 min barelə, qaz ixracı isə 229 mln. standart kubfuta bərabər olacaq.

İ.Məmmədov həmçinin qeyd edib ki, platforma üçün bərkidici borular Azərbaycanda istehsal olunacaq: «Əgər bundan öncə bərkidici platformalar xaricdən gətirilirdisə, yeni platforma üçün bərkidici borular Dərin Özüllər Zavodunda hazırlanacaq ki, zavodda yeni istehsal xətti, həmçinin mövcud avadanlıqların yenidən qurulması təşkil olunacaq».

Qeyd edə ki, hazırda Xəzərdə 5 platforma mövcuddur («Çıraq», «Mərkəzi Azəri», «Qərbi Azəri», «Şərqi Azəri» və «Dərinsulu Günəşli») və 2009-cu ilin yanvar-sentyabr aylarında bu platformalardan təxminən 224 mln. barel (30 mln. ton) neft hasil olunub ki, bu da gündə orta hesabla 822,1 min bareldən (b/g) çoxdur.

Xatırladaq ki, AÇG yataqlarının işlənməsi layihəsində BP (operator - 34,1%), «Chevron» (10,2%), ARDNŞ (10%), «Inpex» (10%), «StatoilHydro» (8,6%), «ExxonMobil» (8%), TPAO (5,6%), «Devon» (5,6%) və «Hess» (2,7%) şirkətləri iştirak edir.