Sənaye və energetika

Ana səhifə

Azərbaycanın «Şahdəniz» yatağının işlənməsi I rübdə 43 mln. dollar əməliyyat xərcləri çəkilib

06 may 2010 15:10 (UTC +04:00)

Bakı. Nicat Mustafayev – APA-Economics. Bu ilin I rübü ərzində Xəzərin Azərbaycan sektorunda yerləşən «Şahdəniz» qaz yatağının işlənməsi layihəsi çərçivəsində 42,8 mln. ABŞ dolları əməliyyat xərcləri və 75 mln. dollar əsaslı xərclər çəkilib.
«BP-Azerbaijan» şirkətindən «APA-Economics»ə verilən məlumata görə, bütövlükdə 2010-cu il üçün «BP-Azerbaijan» şirkəti «Şahdəniz» üzrə fəaliyyətə 177,8 mln. dollar əməliyyat xərcləri və 604,8 mln. dollar əsaslı xərclər qoymağı planlaşdırır.
Hasilata gəldikdə isə, hesabat dövründə yataqdan təxminən 2 mlrd. kubmetr qaz və 0,54 mln. ton kondensat və ya gündəlik orta hesabla təxminən 22 mln. kubmetr qaz və 47,5 min barel kondensat hasil olunub: «Bütün il üçün «Şahdəniz»də hasilat planı 7,6 mlrd. kubmetr qaz və 16 mln. barel kondensat təşkil edir».
Bununla yanaşı, 2006-ci ilin sonunda «Şahdəniz»də hasilat başlanandan 2010-cu il I rübün sonunadək yataqdan dünya bazarlarına 39,34 mln. barel (təqribən 4,98 mln. ton) kondensat ixrac edilib: «Növbəti illər ərzində platformadan qazılacaq yeni quyular işə salındıqca hasilat tədricən artacaq. Belə ki, Mərhələ 1-də hasilatın ən yüksək sabit səviyyəsinin ildə 8,6 mlrd. kubmetr qaz və gündə təxminən 45 min barel kondensat olacağı gözlənilir».
Qazma işlərinə gəldikdə isə, 2010-cu ilin əvvəlində «BP-Azerbaijan» şirkəti yeni quyular sistemini istismara verib və fevral ayında platformadan yeni bir quyunu SDA-06-nı qazmağa başlayıb. Bundan başqa, şirkət bu ilin III rübündə mövcud SDA-04 quyusunda bəzi yoxlama əməliyyatları da aparacaq.

Xatırladaq ki, yatağın ehtiyatları 1,2 trln. kubmetr həcmində qiymətləndirilir və hazırda «Şahdəniz» yatağında hasilat 4 quyudan aparılır, gündəlik hasilat isə 22 mln. kubmetr təşkil edir. «Şahdəniz» yatağının işlənməsi layihəsinin ikinci fazası çərçivəsində illik hasilatın 30 mlrd. kubmetrə çatacağı proqnozlaşdırılır. Layihənin iştirakçıları isə BP (əsas operator - 25,5%), «Statoil» (kommersiya operatoru - 25,5%), ARDNŞ (10%), «LUKoil» (10%), NICO (10%), «Total» (10%) və TPAO (9%) şirkətləridir.

Qeyd edək ki, 2015-2030-cu illərdə Azərbaycanın qaz ixracının ildə 30-35 mlrd. kubmetr təşkil edəcəyi proqnozlaşdırılır. Göstərilən miqdardan 15-20 mlrd. kubmetr qazı Azərbaycan Avropaya nəql edə biləcək.