Sənaye və energetika

Ana səhifə

Azərbaycanda inşa ediləcək neft-kimya kompleksinin əsas konsepsiyası yaxın aylarda hazır olacaq

07 may 2010 13:00 (UTC +04:00)

Bakı. Rəşad Süleymanov – APA-Economics. Bakı şəhərinin Qaradağ rayonunda tikiləcək neft-kimya kompleksinin konsepsiyası bu ilin iyul ayınadək hazır olacaq və bundan sonra texniki iqtisadi əsaslandırma və layihənin işlənilməsinə başlanılacaq. «APA-Economics»in məlumatına görə, bunu ARDNŞ prezidenti Rövnəq Abdullayev bildirib.

R.Abdullayev bu kompleksin Sumqayıtda yerləşən kimya müəssisələri ilə bağlı işləyəcəyini də vurğulayıb: «Konsepsiyaya əsasən, 10 mln. tonluq neftayırma zavodu tikilərsə, 500 min tona qədər nafta alınacaq. Bu naftanı Sumqayıtda emal etməli olacağıq».

ARDNŞ prezidenti «Azərikimya» İstehsalat Birliyinin inkişafı və Sumqayıtda kimya texnoparkının yaradılması konsepsiyasının hazırlandığını da qeyd edib: «Sumqayıtda nafta xammalı ilə işləyən kimya sektorunu inkişaf etdirmək niyyətindəyik. Artıq konsepsiya hazırdır və Sumqayıtdakı mövcud qurğular modernləşdiriləcək. Bu istiqamətdə Avropa və Amerika şirkətləri ilə danışıqlar da gedir. Etilen-Polietilen Zavodundakı EP-300 qurğusunu modernləşdirmək, eləcə də iki yeni qurğu inşa etməklə, xammalı artırmaqla məhsuldarlığı 3 dəfə artırmağı planlaşdırırıq».

R.Abdullayev onu da vurğulayıb ki, Sumqayıtda dövlət başçısının tapşırığına əsasən kimya texnoparkının yaradılması planlaşdırılır. Hazırda ARDNŞ İqtisadi İnkişafı Nazirliyi ilə birgə bu texnoparka özəl şirkətlər və investisiya fondlarının cəlb edilməsi istiqamətində müzakirələr aparır.