Sənaye və energetika

Ana səhifə

Gürcüstan paytaxtında Azərbaycan-Gürcüstan və Rumıniyanın energetika nazirlərinin görüşü keçiriləcək

12 may 2010 00:13 (UTC +04:00)

Tbilisi. Nizami Məmmədzadə-APA. Mayın 12-də Gürcüstan paytaxtında Azərbaycan, Gürcüstan və Rumıniyanın energetika nazirlərinin birgə görüşünün keçiriləcəyi gözlənilir.
APA-nın Gürcüstan bürosunun verdiyi xəbərə görə, tədbirdə energetika məsələləri və cari ilin aprelin 13-də Buxarestdə imzalanan memorandumun üç ölkə tərəfindən həyata keçirilməsi məsələləri müzakirə olunacaq. Bu barədə Gürcüstanın energetika naziri Aleksandr Hetaquri jurnalistlərə bildirib.

Onun sözlərinə görə, Azərbaycan qazının sıxılması üçün terminalın tikintisi Kulevi neft terminalında nəzərdə tutulub. Layihənin qiyməti 4-6 milyard avro təşkil edir. Digər bir terminalın isə Rumıniyada tikilməsi nəzərdə tutulub. Layihəyə görə, Azərbaycan qazı Gürcüstanda sıxılacaq, Rumıniyaya nəql edilərək orada maye halına salınacaq və bundan sonra Avropa ölkələrinin qaz təminatı ödəniləcək.

APA-nın məlumatına görə, mayın 12-də keçiriləcək görüş çərçivəsində hər üç ölkənin nazirlərinin müştərək şirkət yaratmaq imkanları barədə danışıqlar aparılması da gözlənilir.

Xatırladaq ki, aprelin 13-də Rumıniyanın Buxarest şəhərində Azərbaycan, Gürcüstan və Rumıniya ölkələrinin energetika nazirləri tərəfindən “Sıxılmış qaz və onun nəqli sahəsində əməkdaşlıq” məsələləri barədə memorandum imzalanıb.