Sənaye və energetika

Ana səhifə

«LUKoil» şirkəti Bakı-Ceyhan neft boru kəmərinə qoşulmaq niyyətindədir

06 oktyabr 2010 09:07 (UTC +04:00)

«APA-Economics»in RBC-ya istinadən verdiyi məlumata görə, Xəzər neftinin boru kəməri ilə nəql edilməsindən başqa şirkət kəmərdə pay sahibi olmaq niyyətindədir, çünki bu halda neftin nəqli daha səmərəli olacaq.

«LUKoil»dan RBC-ya birlirilib ki, hazırda BTC şirkət tərəfindən baxılmaqda olan 4 marşrut sırasındadır. BTC-dən başqa Rusiya şirkəti Bakı-Novorossiysk, Xəzər Boru Kəməri Konsorsiumu və tanker vasitəsi ilə «LUKoil»a məxsus olan Volqoqrad Neft Emalı Zavoduna nəql edilməsi imkanlarını araşdırır.

Qeyd edək ki, Xəzərdə «LUKoil»a məxsus olan 8 yatağın yaxın zamanda işə salınması göslənilir və bundan sonra nəqletmə məsələləri daha da aktuallaşacaq. Şirkətdən bildirilib ki, nəqletmə tariflərinin aşağı salınması məqsədi ilə «LUKoil» BTC-də pay almaq fikrindədir.

«RusEnergy» konsaltinq şirkətinin nümayyəndəsi Mixail Krutixinin sözlərinə görə, BTC kəməri hazırda tam doldurulmayıb və bu marşrutla əlavə neft göndərilə bilər. Həmçinin M.Krutixin bildirib ki, BTC sistemində hazırda iki tarif qüvvədədir ki, bunlardan biri konsorsium («BTC Co.») iştirakçıları, digəri isə kənar şirkətlər üçün müəyyəqnləşdirilib və bu tariflər arasında kəskin fərq mövcuddur. Bu səbəbdən «LUKoil» üçün BTC kəməri ilə neftin nəqli yalnız konsorsiumun iştirakçısı kimi səmərəli ola bilər. Qeydi-rəsmi məlumata görə, «LUKoil» «ConocoPhilips» şirkətinin BTC-də olan payını ala bilər. Qeyd edək ki, bu yaxınlarda «LUKoil» həmin şirkətin 4,99%-lik səhm zərfini alıb.

Həmçinin M.Krutixin vurğulayıb ki, BTC ilə neftin nəqli imkanları Qazaxıstana da təklif olunub, lakin rəsmi Astana bundan imtina edib və əvəzində Xəzər Boru Kəməri Konsorsiumu üzrə kvotasını 27 mln. tondan 52,5 mln. tonadək artırıb. Bunu Qazaxıstanın neft və qaz naziri Sauat Mınbayev bildirib.

Xatırladaq ki, BTC boru kəməri Azərbaycan, Gürcüstan və Türkiyə ərazisindən keçir. Onun səhmdarları sırasına BP (30,1%), «AzBTC» (25%), «Chevron» (8,9%), «Statoil» (8,71%), TPAO (6,53%), ENI (5%), «Total» (5%), «Itochu» (3,4%), «Inpex» (2,5%), «ConocoPhilips» (2,5%) və «Hess» (2,36%) şirkətləri var.