Sənaye və energetika

Ana səhifə

«Nabucco» qaz kəməri layihəsi üzrə investisiya qərarı gələn il qəbul olunacaq

08 oktyabr 2010 12:17 (UTC +04:00)

Bakı. Nicat Mustafayev – APA-Economics. «Nabucco» qaz kəməri layihəsi üzrə investisiya qərarının həlli 2011-ci ilə təxirə salınıb. «APA-Economics»in Avstriya mətbuatına istinadən verdiyi məlumata görə, bunu Avstriyanın OMV şirkətinin rəhbəri Mixael Ulbrix bildirib.

Onun sözlərinə görə, layihə üzrə investisiya qərarının bu il ərzində həlli mümkün olmayacaq. Bu ilin avqust ayında OMV şirkətinin rəsmiləri «Nabucco» üzrə investisiya qərarına dair məsələlərin ləngiməsini bildirmişdir. Buna səbəb kimi isə Azərbaycan tərəfi ilə aparılan danışıqların uzanması göstərilib. Ləngimə Azərbaycanın «Şahdəniz» layihəsinin ikinci fazasında hasil ediləcək qazın hansı hansı kəmərlə ixrac edilməsi ilə parallel olaraq 20 şirkətlə keçirilən danışıqlarla bağlıdır ki, Azərbaycan qazı əlverişli şərtlərlə satmaq niyyətindədir.

Qeyd edək ki, sentyabrın 6-da «Nabucco Gas Pipeline International GmbH» şirkətinin («Nabucco» layihəsinin operatoru) səhmdarları (Avropa Yenidənqurma və İnkişaf Bankı – EBRD, Avropa İnvestisiya Bankı - EIB və Beynəlxalq Maliyyə Korporasiyası – IFC) zaminlik sənədi imzalayıb ki, bu da layihənin dəyərinin müəyyənləşdirilməsi prosesinin başlanması deməkdir. İlkin olaraq layihə 4 mlrd. avro məbləğində qiymətləndirilir ki, bunun 2 mlrd. avrosunu EIB, 1,2 mlrd. avrosunu EBRD, 800 mln. avrosunu IFC (400 mln. avro IFC-nin özü ayıracaq, 400 mln. avronu isə Korporasiya sindikatlaşdırılmış kredit şəklində təqdim edəcək) ayıracaq, daha 600 mln. avro isə kommersiya banklarından cəlb olunacağı gözlənilir.

Xatırladaq ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline International GmbH.» konsorsiumuna OMV, «MOL Natural Gas Transmission Company» (Macarıstan), «S.N.T.G.N. Transgaz S.A.» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 26-31 mlrd. kubmetr həcmində nəzərdə tutulub.