Sənaye və energetika

Ana səhifə

«Azərikimya» Almaniyanın «BASF» şirkəti ilə tərəfdaşlıq əlaqələri qurmaq niyyətindədir

22 oktyabr 2010 10:20 (UTC +04:00)

Bakı. Nicat Mustafayev - APA-Economics. Azərbaycan Dövlət Neft Şirkətinin “Azərikimya” İstehsalat Birliyi Almaniyanın “BASF” şirkəti ilə tərəfdaşlıq əlaqələri qurmaq niyyətindədir.

İstehsalat Birliyindən «APA-Economics»ə verilən məlumata görə, Sumqayıtda keçirilən «Azərkimya» və «BASF» şirkətinin nümayəndələri arasında keçirilən görüşdə tərəflər Almaniyada və Azərbayjanda istehsal olunan kimya və neft-kimya məhsulları, onların çeşidlərinin və həjminin artırılması, dünya bazarına çıxışın və mövqelərin daha da möhkəmləndirilməsi ilə bağlı işgüzar müzakirələr aparıb.

Görüş zamanı «BASF»ın dəstəyi ilə Azərbaycanın neft-kimya kompleksinin daha sürətli inkişafının təmin edilməsi üçün reallaşdırılması nəzərdə tutulan tədbirlər nəzərdən keçirilərək təhlil edilib.

Görüşdə yaxın perspektiv üçün «BASF»ın dəstəyi ilə «Azərikimya»nın yeni, daha səmərəli və tullantısız texnologiyalara əsaslanan yeni istehsal sahələrinin, sənaye şəhərciyinin yaradılması məsələsi də müzakirə obyekti olub.

Qeyd edək ki, «BASF»ın nümayəndəlikləri 100-ə qədər ölkədə fəaliyyət göstərir. Dünya bazarında neft və neft-kimya məhsullarının satışı üzrə lider mövqeyə malik olan şirkət bütün kontinentlərdə 150-dən artıq istehsalat sahəsinə malik olmaqla öz məhsullarını dünyanın 200-ə qədər ölkəsinin sifarişçilərinə göndərir. Şirkətin təkliflər portfelinə neft və təbii qazla yanaşı müxtəlif təyinatlı kimya məhsulları, plastiklər, kənd təsərrüfatı üçün nəzərdə tutulan və zərif kimya məhsulları daxildir. Ötən il «BASF»ın məhsul satışının həcmi 50 mlrd. avro təşkil edib.

Üç il əvvəl isə «BASF» şirkətinin Sumqayıtın H.Z.Tağıyev qəsəbəsində yaratdığı müəssisə artıq ümumi illik həcmi 6 min ton olan 15-ə qədər çeşiddə məhsul istehsal edir.