Sənaye və energetika

Ana səhifə

Azərbaycan və Özbəkistan iqtisadi əməkdaşlığın mümkün sahələrini araşdırır

06 dekabr 2010 07:49 (UTC +04:00)

Bakı. Nicat Mustafayev – APA-Economics. Bakıda keçirilən Özbəkistan Milli Sərgisində (3-5 dekabr) iştirak etmək məqsədilə Azərbaycanda səfərdə olan Özbəkistanın baş nazirinin müavini, xarici iqtisadi əlaqələr, investisiya və ticarət naziri Eliyor Qəniyevin başçılıq etdiyi nümayəndə heyəti və Azərbaycanın iqtisadi inkişaf naziri Şahin Mustafayev Bakı və Sumqayıtda müasir texnologiyalar əsasında fəaliyyət göstərən müəssisələrdə olub.

İqtisadi İnkişaf Nazirliyindən «APA-Economics»ə verilən məlumata görə, Sumqayıt Texnologiyalar Parkında olan qonaqlara məlumat verilib ki, texnopark Azərbaycan sənayesində yeni infrastruktur layihələr həyata keçirən nəhəng istehsal müəssisəsidir. Hazırda texnoparkda 6 zavod fəaliyyət göstərir, yaxın vaxtlarda daha 2 zavodun (Sinkləmə və Dəqiq Emal Mərkəzləri zavodları) istifadəyə verilməsi nəzərdə tutulur, 8 zavodun inşası isə davam edir. Hazırda müəssisədə 800-ə qədər işçi çalışır, bütün zavodlar fəaliyyətə başladıqdan sonra isə iş yerlərinin sayı 2 500-ə çatdırılacaq.

Qonaqların diqqətinə həmçinin çatdırılıb ki, 16 zavoddan ibarət olacaq bu parkda müxtəlif çeşidli məhsullar - kabel, transformator, yüksək gərginlikli avadanlıqlar, hidroturbin, su nasosları, elektrik mühərrikləri, borular və s. istehsalı genişləndiriləcək.

«Caspian Fish Co. Azerbaijan» müəssisəsinin fəaliyyəti ilə tanış olan Özbəkistan nümayəndə heyəti qabaqcıl texnologiyalar əsasında qurulmuş istehsal prosesi, o cümlədən müəssisədə istehsal edilən məhsullarla tanış olub. Məlumat verilib ki, müəssisədə istehsal olunan balıq və balıq məhsulları xarici ölkələrə ixrac edilir.

Daha sonra qonaqlar «MKT İstehsalat-Kommersiya» MMC-nin Bakı İplik Fabrikində də olub. Müəssisədə bildirilib ki, ən yeni texnoloji standartlara cavab verən fabrikdə yerli xammaldan müxtəlif növ ipliklər istehsal edilir. Fabrikin potensial texnoloji imkanları çeşidləri artırmağa və daha 30 növ ip istehsal etməyə imkan verir. Məhsullar əsasən Rusiyaya ixrac edilir. Müəssisədə istehsal prosesi tam avtomatlaşdırılıb. İstehsal olunan məhsulun keyfiyyətinə nəzarət etmək məqsədilə fabrikdə Almaniya avadanlığı ilə təchiz edilmiş laboratoriya fəaliyyət göstərir. Müəssisənin qarşısında duran əsas məqsəd son məhsul istehsalının təşkili (trikotaj məhsulları), ixrac imkanlarını genişləndirməklə yeni məhsulları dünya bazarlarına çıxmaqdır.

Daha sonra Özbəkistan nümayəndə heyəti ilə müzakirələr aparılıb və iki ölkə arasında iqtisadi sahədə əməkdaşlığın genişləndirilməsində qarşılıqlı səfərlərin, işgüzar görüşlərin əhəmiyyəti vurğulanıb. Müzakirələr zamanı əməkdaşlığın mümkün sahələrinin müəyyənləşdirilməsi və bu istiqamətdə sistemli tədbirlərin həyata keçirilməsinin vacibliyi qeyd edilib.