Sənaye və energetika

Muxtar Babayev: «Azərkimya» İstehsalat Birliyi istehsalın çeşidi və keyfiyyətini artırır»

18 aprel 2011 12:10 (UTC +04:00)

Bakı. Əli Əhmədov – APA-Economics. Azərbaycan Dövlət Neft Şirkətinin «Azərkimya» İstehsalat Birliyində (İB) istehsal olunan məhsulların çeşidinin genişləndirilməsi və keyfiyyətinin yüksəldilməsi ilə bağlı işlər aparılır. Bu işlərə ARDNŞ-in müvafiq strukturları, eləcə də xarici məsləhətçilər cəlb olunub. «APA-Economics»in məlumatına görə, bunu İB-nin baş direktoru Muxtar Babayev bildirib.

Onun sözlərinə görə, hazırda «Azərkimya»nın müəssisələrində buraxılan bəzi məhsullar Avropa standartlarına uyğunlaşdırılır. İndiyədək onların standartlara uyğun olmaması nəticəsində belə məhsullar aşağı qiymətlə ixrac olunub: «İndi isə keyfiyyəti standarta uyğun olmayan məhsulların ixracına yol verilmir. Ümumiyyətlə, «Azərkimya»nın istehsal etdiyi məhsulun 90%-dən çoxu ixrac edildiyinə görə, məhsulun keyfiyyətində mühüm dəyişikliklərə nail olmalıyıq».

Bundan başqa, ilin sonunadək satılan məhsulların hamısı qablaşdırılacaq ki, bu da məhsulun nəqlini asanlaşdıracaq, həm də dünya standartlarına uyğundur.

M.Babayev vurğulayıb ki, hazırda İB-də yeni məhsulların istehsalının təşkili ilə bağlı da işlər aparılır. Söhbət digər polietilen növləri və polipropilen istehsalının yaradılmasından gedir. M.Babayevin sözlərinə görə, bu məhsullara həm ölkə daxilində, həm də xarici bazarlarda böyük ehtiyac var. Bundan başqa, EP-300 qurğusunun və polimer 120 qurğularının yenidən qurulması planlaşdırılır Bunun üçün vaxtı ilə həmin qurğuları layihələndirən Rusiyalı mütəxəssislər cəlb olunublar. Onların araşdırmalarından sonra bunun üçün hansı işlərin görülməsi müəyyənləşəcək. Ümumilikdə, bu il ərzində «Azərkimya»nın müəssisələrində 80 min tona yaxın polietilen və 40 min ton propilen istehsalı nəzərdə tutulsa da, real istehsal bundan artıq olacaq.

M.Babayev bildirib ki, dünya bazarında neftin bahalaşması ilə əlaqədar olaraq kimya məhsullarının da qiyməti artıb.