Sənaye və energetika

Azərbaycan yeni neft-qaz layihələrinin icrasına başlayır

18 aprel 2011 14:13 (UTC +04:00)

«APA-Economics»in məlumatına görə, bu layihələr barədə bu gün Bakıda işə başlayan V Xəzər Neft-Qaz Ticarət-Nəqliyyat Konfransındakı çıxışında Azərbaycan Dövlət Neft Şirkətinin (ARDNŞ) I vitse-prezidenti Xoşbəxt Yusifzadə məlumat verib.

X.Yusifzadənin sözlərinə görə, «Azəri-Çıraq-Günəşli» yataqlarında Çıraq Neft Layihəsi çərçivəsində işlər aparılır. Konsorsium tərəfindən burada yeni platformanın qurulması və buradan istismar quyularının qazılması nəzərdə tutulub.

Hazırda ARDNŞ və BP şirkətləri arasında «Azəri-Çıraq-Günəşli» yataqlarının dərin qatlarının istismarı ilə bağlı intensiv danışıqlar aparılır. Onun sözlərinə görə, söhbət bu yataqların altındakı qaz layından hasilata başlanmasından gedir. Layihə həyata keçiriləcəyi təqdirdə burada qaz hasilatına 2017-ci ildə başlanması gözlənilir. Qeyd edək ki, dərin yataqdakı qaz ehtiyatları 200-250 mlrd. kubmetr həcmində qiymətləndirilir.

«Şahdəniz» layihəsinin II mərhələsinin başlanması üçün də işlər davam etdirilir. Bu mərhələnin işə düşməsi nəticəsində yataqda qaz hasilatının illik həcmi indiki 8,6-9 mlrd. kubmetrdən 25 mlrd. kubmetrə qədər artacaq.

Paralel olaraq ARDNŞ tərəfindən böyük ehtiyatlara malik olan «Ümid» yatağında işlər davam edir – burada ikinci quyunun qazılmasına başlanıb. «Ümid» yatağında 200 mlrd. kubmetr qaz və 40 mln. ton neft kondensatı ehtiyatı var.

X.Yusifzadənin sözlərinə görə, «Ümid» yatağında iri ehtiyatların tapılması faktiki olaraq onunla bitişik olan yataqların perspektivini – burada iri ehtiyatların olması ehtimalını artırıb. Bunlardan biri - «Babək» yatağında ehtiyatlar 400 mlrd. kubmetr qaz və 80 mln. ton kondensat həcmində qiymətləndirilir.

Bundan başqa, «Ümid»dəki tapıntı nəticəsində «Naxçıvan», «Məşəl», «Zəfər», «Asiman», «Şəfəq», «Araz», «Alov», «Şərq» və «Abşeron» yataqlarının perspektivi də yüksəlib. Qeyd edək ki, hazırda «Abşeron» yatağında layihə operatoru olan «Total» şirkəti tərəfindən axtarış quyusu qazılır. Layihə dərinyi 7200 metr olan quyuda qazma işləri 3363 metrə çatıb.

Bundan başqa, ARDNŞ ötən ilin sonundan etibarən «Bulla-Dəniz» və «Ələt-Dəniz» yataqlarında kəşfiyyat işlərini bərpa edib. Hazırda «Bulla-Dəniz»də layihə dərinliyi 6400 metr, «Ələt-Dəniz»də 4900 metr olan quyular qazılır.

Perspektiv planlara əsasən, ARDNŞ 1998-ci ildə xarici şirkətlər tərəfindən kəşf edilmiş «Qarabağ-Əşrəfi» yataqlarında da kəşfiyyat və istismar işləri aparmağı planlaşdırır.

Bununla yanaşı, Xəzərin Azərbaycan sektorunun azsulu hissəsində kiçik yataqlarda da kəşfiyyat işlərinin aparılması nəzərdə tutulub.

Bütün bunlar, eləcə də «Ümid» yatağından hasilatın başlanması nəticəsində perspektivdə Azərbaycanda neft hasilatının illik 50 mln. ton həddində sabitləşəcəyi, qaz hasilatının isə 2015-ci ildə illik 30 mlrd. kubmetrə çatacağı gözlənilir.