Sənaye və energetika

İran və Türkiyə enerji yol xəritəsi sazişini yekunlaşdırıb

04 may 2011 15:33 (UTC +04:00)

Bakı. Əhməd Yusifzadə - APA-Economics. Tehran və Ankara birgə investisiya sahəsində əməkdaşlığı inkişaf etdirmək məqsədilə enerji yol xəritəsi üzrə razılaşmanı yekunlaşdırıb.

“APA-Economics”in Press TV saytına istinadən məlumatına görə, bunu Ankarada Türkiyənin enerji və təbii ehtiyatlar naziri Taner Yıldızla ilə birgə mətbuat konfransında çıxış edən İranın energetika naziri Məcid Namcu bildirib.

Onun sözlərinə görə, saziş İran və Türkiyə arasında enerji mübadiləsinin həcmini 500 meqavatdan 1000 meqavata çatdırılmasını nəzərdə tutur. Nazir İranın istehsal etdiyi elektrik enerjisini Türkiyənin başqa ölkələrə nəql edə biləcəyini diqqətə çatdırıb.

T.Yıldız isə qeyd edib ki, İran, İraq, Azərbaycan, Rusiya və Türkmənistan zəngin təbii enerji mənbələrinə malik olub Türkiyənin enerji tələbatının ödənilməsində yüksək önəm kəsb edirlər. Nazir bu sahədə işbirliyinin genişləndirilməsinin vacibliyini vurğulayıb.

Qeyd edək ki, Türkiyə hökuməti 2023-cü ilə qədər ölkənin elektrik istehlakının ikiqat artacağını proqnozlaşdırır. Dünyanın ən zəngin neft və qaz ehtiyatlarına malik olan İran Rusiyadan sonra Türkiyənin ikinci ən böyük enerji tərəfdaşıdır.