Sənaye və energetika

Litva Rusiya qazından imtina edir

12 may 2011 15:14 (UTC +04:00)

Bakı. Əli Əhmədov - APA-Economics. Litva bahalı Rusiya qazını almaqdan imtina etməyə hazırlaşır. “APA-Economics”in məlumatına görə, bunu ölkənin Energetika Nazirliyi bəyan edib.

Energetika naziri Arvidas Syakmokas bildirib ki, ABŞ-ın “Cheniere Energy” şirkəti Litvaya “Qazprom”un satdığından daha ucuz qiymətə qaz təklif edir. Bu şirkət ABŞ-da şist qazı hasilatı ilə məşğuldur. Artıq Litvanın “Klaipedos nafta” şirkəti “Cheniere Energy” şirkəti ilə sıxılmış qaz almaq barədə niyyət protokolu imzalayıb: «Amerikalıların təklif etdiyi qaz «Qazprom»dan aldığımızdan 30%-ə qədər ucuzdur».

Ekspertlər bu razılaşmanı tamamilə real sayırlar. UBS şirkətinin analitiki Konstantin Çerepanov «Gazeta.ru»ya bildirib ki, ABŞ-da təbii qazın qiyməti Avropadan qat-qat ucuz - min kubmetrə görə 150 dollar təşkil edir: “Hətta daşıma xərclərini (90-110 dollar) nəzərə alanda da ABŞ şirkəti Litvaya qazı “Qazprom”dan ucuz sata bilər. “Qazprom” isə Avropaya qazı orta hesabla 350-370 dollara satır”.

ABŞ qazını Litvaya çatdırmaq üçün burada sıxılmış qaz terminalı və ona bitişik qaz kəməri tikiləcək. Tikintiyə 2011-ci ildə başlanacaq. 3 ildən sonra işə düşəcək terminalın gücü ildə 1,5-2,2 mln. ton sıxılmış qaz (2-2,9 mlrd. kubmetr təbii qaz) təşkil edir ki, bu da Litvanın tələbatını (3 mlrd. kubmetr) az qala tamamilə ödəməyə imkan verir.

Analitiklər bu addımı Rusiya üçün mənfi hal kimi qiymətləndirirlər. Hərçənd bəzi mütəxəssislərin fikrincə, bu üsul yalnız kiçik bazarlarda özünü doğruldur. Qaza tələbatı böyük olan ölkələr üçün təbii qazı sıxılmış qazla əvəz etmək çətindir.