Sənaye və energetika

Bu ilin ilk üç ayında “Şahdəniz” yatağından 1,84 mlrd. kubmetr qaz çıxarılıb

17 may 2011 11:56 (UTC +04:00)

Bakı. Əli Əhmədov - APA-Economics. Bu ilin birinci rübündə “Şahdəniz” yatağından təqribən 1,84 mlrd. kubmetr qaz və 0,4 mln. ton (təqribən 3,1 mln. barel) kondensat hasil edilib.

Layihənin operatoru BP şirkətindən “APA-Economics”ə verilən məlumata görə, rüb ərzində yataqdan gündəlik təqribən 20,4 mln. kubmetr qaz və 34 400 barel kondensat hasil olunub.

Ümumilikdə 2006-cı ilin sonlarında “Şahdəniz”də hasilat başlanandan 2011-ci ilin birinci rübün sonunadək yataqdan dünya bazarlarına təqribən 52,9 mln. barel (təqribən 6,7 mln. ton) kondensat ixrac edilib.

Növbəti illər ərzində platformadan qazılacaq yeni quyular işə salındıqca, hasilatın da getdikcə artması gözlənilir. Mərhələ 1-də hasilatın ən yüksək sabit səviyyəsinin ildə təqribən 9 mlrd. kubmetr qaz və gündə təxminən 50 min barel kondensat olacağı gözlənilir.

Birinci rüb ərzində «Şahdəniz» üzrə fəaliyyətlərə 47,9 mln. dollar əməliyyat xərcləri və 125,8 mln. dollar əsaslı xərclər çəkilib. Bütün il üçün bu rəqəmlərin müvafiq olaraq 169,9 mln. və 791,6 mln. olacağı gözlənilir.