Sənaye və energetika

“Şahdəniz” qazının Avropaya daşınması üçün təkliflər oktyabr ayınadək qəbul ediləcək

17 may 2011 14:57 (UTC +04:00)

Bakı. Əli Əhmədov - APA-Economics. «Şahdəniz» yatağının tammiqyaslı işlənməsi layihəsi çərçivəsində ilk qazın 2017-ci ildə əldə ediləcəyi gözlənilir.

Layihənin operatoru “BP” şirkətindən «APA-Economics»ə verilən məlumata görə, «Şahdəniz»in tammiqyaslı işlənməsi yeni cənub qaz dəhlizi vasitəsilə Azərbaycan qazını Avropaya və Türkiyəyə çatdırmaqla Avropa bazarlarının qaz təchizatını və enerji mənbələrinin müxtəlifliyini artırmaq məqsədi daşıyan nəhəng bir layihədir. Bu layihə nəticəsində «Mərhələ 1» çərçivəsində ildə təqribən 9 mlrd. kubmetr qaza ildə 16 mlrd. kubmetr qaz əlavə edəcəyi nəzərdə tutulur.

Qeyd edək ki, «Şahdəniz»in tammiqyaslı işlənməsi hazırda dünyanın ən böyük qaz işlənməsi layihələrindən biridir. Yeni cənub dəhlizi Avropaya qaz idxalının təhlükəsizliyi və çoxşaxəliliyini əsaslı şəkildə artıracaq.

İndiki planlara görə, “Şahdəniz”in tammiqyaslı işlənməsi layihəsi çərçivəsində dənizdə emal gücü ildə 16 mlrd. kubmetr qaz olan və körpü ilə birləşdirilmiş iki yeni platforma, 2 yarımdalma qazma qurğusundan qazılacaq 26 sualtı quyu, suyun 550 metrədək dərinliyində 500 km uzunluğunda sualtı boru kəməri şəbəkəsinin yaradılması daxildir. Bundan başqa, layihə çərçivəsində Cənubi Qafqaz Boru Kəmərinin (Bakı-Tbilisi-Ərzurum) ildə 16 mlrd. kub metr əlavə qaz daşımaq üçün genişləndirilməsi və Səngəçal terminalının genişləndirilməsi nəzərdə tutulur.

BP şirkətindən verilən məlumata görə, layihə artıq son mərhələlərədək irəliləyib və ilk qazın 2017-ci ildə əldə ediləcəyi gözlənilir. Belə ki, yataqda SDX06 qiymətləndirmə quyusu uğurla qazılaraq kollektora çatıb və gələcək işlənmə üçün bağlanıb, növbəti quyu - SDX07 qazılmağa başlayıb. Həm hasilat, həm də ixrac sahələri üzrə növbəti mərhələ mühəndis-layihə işləri davam edir.

Bundan başqa, «Şahdəniz»in uzun müddətli qaz satışı sazişlərinə kömək məqsədilə ARDNŞ və «Şahdəniz» tərəfdaşları hasilatın pay bölgüsü sazişinin 2031-ci ildən 2036-cı ilədək beş illik uzadılması sənədini imzalayıblar. Bu işlər çərçivəsində BOTAŞ-la və Avropa İttifaqının əsas perspektiv boru kəməri qrupları ilə, o cümlədən İTGİ (İnterconnect Turkey-Greece-İtaly), TAP (Trans-Adriatik boru kəməri) və “Nabucco” ilə işləmək məqsədilə Ankarada «Şahdəniz» ixrac tranzit təşkilatı yaradılıb. “Şahdəniz” ixrac tranzit təşkilatı bütün boru kəməri qruplarından bu ilin oktyabr ayının 1-dək qaz nəqli üçün dəqiqləşdirilmiş təkliflərini təqdim etməyi istəyib. İxrac marşrutunun seçilməsi qərarı təkliflərin kommersiya, texniki və strateji meyarları əsasında qəbul ediləcək.