Sənaye və energetika

Kulevi Qara Dəniz Terminalının istifadəyə verilməsindən 3 il keçir

19 may 2011 08:30 (UTC +04:00)

Bakı. Əli Əhmədov - APA-Economics. Kulevi Qara Dəniz Terminalının istifadəyə verilməsinin 3 ili tamam olub.

Azərbaycan Dövlət Neft Şirkətindən «APA-Economics»ə verilən məlumata görə, ötən müddətdə terminal Qafqaz regionunda ən uğurlu fəaliyyət göstərən terminallardan birinə çevrilib.

2008-ci ildə neft və neft məhsulları ilə yüklənmiş ilk sisternləri qəbul etməyə başlayan terminal 2010-cu ildən Qazaxıstanın “Tengiz” yatağından hasil edilən xam neftin ötürülməsinə başlayıb. Kulevi terminalının ən böyük nailiyyətlərindən biri burda İnteqrasiya Edilmiş İdarəetmə Sisteminin yaradılmasıdır. «Moody International» beynəlxalq reytinq agentliyinin rəyinə əsasən, bu sistem ISO 9001, ISO 14001 və OHSAS 18001 beynəlxalq standartlarının tələblərinə tam cavab verir. Müasir texnologiya və yüksək ixtisaslı personal terminalda təhlükəsiz və səmərəli əməliyyatlar həyata keçirməyə, eləcə də qəzalara qarşı yüksək hazırlığa nail olmağa imkan yaradıb.