Sənaye və energetika

Azərbaycanda istismara qəbul edilməyən yeni binalara qaz verilməyəcək

27 may 2011 13:29 (UTC +04:00)

Bakı. Əli Əhmədov - APA-Economics. Yeni tikilən binaların qazlaşdırılmaması onların dövlət komissiyası tərəfindən istismara qəbul edilməməsi ilə bağlıdır. «APA-Economics»in məlumatına görə, bu barədə Azərbaycan Dövlət Neft Şirkətinin (ARDNŞ) «Azəriqaz» İB-nin Layihə-smeta və ekspertiza şöbəsinin rəisi Harun Vahabov bildirib.

Onun sözlərinə görə, yeni tikilən binaların qazlaşdırılması məsələsində «Azəriqaz» İB-ə çoxsaylı şikayətlər gəlir: «Vətəndaşların başqa dövlət qurumlarına, o cümlədən Prezident Aparatından tutmuş ARDNŞ-a qədər bütün ərizələri icra olunmaq üçün bizə yönəldilir».

Bu müraciətlərdə vətəndaşlar yeni tikilən binalarda 3-4 ildir yaşadıqlarını, burda işıq-su olduğu halda qazın olmadığını bildirirlər. Şöbə rəisinin sözlərinə görə, «Azəriqaz» İB-nin bu müraciətlərə cavabı eynidir: «O da ondan ibarətdir ki, Nazirlər Kabinetinin 5 dekabr 2008-ci ildə təsdiqlədiyi «Fövqəladə Hallar Nazirliyi tərəfindən tikinti fəaliyyətinə dövlət nəzarətinin mərhələli həyata keçirilməsi Qaydaları» var. O qaydalara əsasən binaya qaz yalnız o vaxt verilir ki, o dövlət komissiya tərəfindən istismara qəbul edilsin. Öz növbəsində dövlət komissiyasına yalnız o binalar təqdim oluna bilər ki, tikintini başlanması və aparılmasına icazə sənədləri olsun, layihə-smeta sənədləri dövlət ekspertizasından keçsin və təsdiq edilsin, tikintisi zamanı bütün norma, standart və qaydalara əməl edilməsi barədə müsbət rəy verilsin. Başqa sözlə, yalnız bu sənədlər təqdim edildikdə qəbul komissiyası işinə başlaya bilər”.

Qaydalara görə, bu obyektlər istismara qəbul ediləndən sonra kommunal xidmətlərə qoşula bilər: «Yəni dövlət komissiyası tərəfindən qəbul edilməyən binaya kommunal xidmətlərin verilməsi qadağandır». O ki qaldı vətəndaşların burda yaşamasına, şöbə rəisinin sözlərinə görə, qəbul aktı olmadan vətəndaşın burda yaşaması da qanunsuzdur. H.Vahabov belə problemlərin yaranmamağı üçün vətəndaşlara qaz, su işıq çəkilmiş və qəbul komissiya tərəfindən istismara qəbul edilmiş binalardan ev almağı məsləhət görüb.