Sənaye və energetika

ARDNŞ: Azərbaycan yaxın illərdə neft və qaz hasilatını əhəmiyyətli şəkildə artıracaq

08 iyun 2011 07:37 (UTC +04:00)

Sərgi və konfransın əsas təşkilatçısı rolunda «Iteca Caspian» şirkəti çıxış edir.

«APA-Economics»in məlumatına görə, konfransın açılışında çıxış edən Azərbaycan Dövlət Neft Şirkətinin (ARDNŞ) prezidenti Rövnəq Abdullayev bildirib ki, Azərbaycan enerji sahəsində diversifikasiyanı prioritet istiqamət kimi qəbul edir və Avropanın enerji təhlükəsizliyinin təminatında öz töhfəsini verməyə çalışır.

Azərbaycanın müstəqillik dövründə neft-qaz sahəsinin inkişaf tarixindən danışan R.Abdullayev qeyd edib ki, 1997-2010-cu illər ərzində ölkədə illik neft hasilatı 5,6 dəfə artaraq 50,7 mln. tona çatıb, gündəlik isə 140 min ton və ya 1 mln. barel neft hasil edilir.

Xəzərin Azərbaycan sektorunda yerləşən «Azəri, Çıraq, Günəşli» yataqlarının işlənməsi çərçivəsində həyata keçirilən Çıraq Neft Layihəsi (ÇNL) ilə yeni mərhələyə qədəm qoyulduğunu deyən ARDNŞ başçısı bildirib ki, ÇNL çərçivəsində ilk neftin 2013-cü ilin IV rübündə hasil ediləcəyi gözlənilir.

«Şahdəniz» layihəsi barədə məlumat verən R.Abdullayevin sözlərinə görə, hazırda burada gündəlik hasilat 23 mln. kubmetr və ya 5 min barel kondensat təşkil edir. «Şahdəniz» layihəsinin II fazası çərçivəsində ildə əlavə olaraq 16 mlrd. kubmetr qazın hasil olunacağı gözlənilir, bunun üçün təxminən 30 hasilat quyusunun qazılması planlaşdırılır. Bu mərhələdə isə ilk qazın 2017-ci ildə çıxarılacağı gözlənilir.

Ümumiyyətlə, 2004-2010-cu illərdə Azərbaycanda qaz hasilatının 5,2 dəfə artaraq 5 mlrd. kubmetrdən 26 mlrd. kubmetrə çatdığını vurğulayan R.Abdullayev ölkənin təsdiq olunmuş şərti enerji ehtiyatlarının 4,2 mlrd. ton təşkil etdiyini bildirib.

ARDNŞ-in Xəzərdə işlənməsinə yeni başladığı «Ümid» strukturundan danışan ARDNŞ prezidenti qeyd edib ki, burada ehtiyatların 40 mln. ton kondensat və 200 mlrd. kubmetr qaz, «Babək» strukturunda isə 400 mlrd. kubmetr və 80 mln. kondensat, «Abşeron» və «Naxçıvan» strukturlarının isə ehtiyatlarının 600 mlrd. kubmetr olduğu bildirilir.

Bununla yanaşı R.Abdullayev qeyd edib ki, artıq 2015-də Azərbaycan neft hasilatını 55 mln. tona, qaz hasilatını isə 30 mlrd. kubmetrə çatdıracaq.

R.Abdullayevin sözlərinə görə, Avropanın qaza olan tələbatının 2020-ci ildə 70%, 2030-cu ildə isə 85% səviyyəsində idxal hesabına təmin edəcəyi gözlənilir.

ARDNŞ rəhbəri qeyd edib ki, Azərbaycan neftin əsas hissəsini, həmçinin Türkmənistan Xəzərlə ixrac etdiyi neft Bakı-Tbilisi-Ceyhan boru kəməri ilə dünya bazarına çıxarılır: «Ümumilikdə isə Azərbaycan 33 ölkəyə neft məhsulları ixrac edir».

İTGİ, TAP və digər beynəlxalq nəqletmə layihələrindən danışan R.Abdullayev qeyd edib ki, Azərbaycan nəqliyyat sistemlərinin diversifikasiyasının tərəfdarıdır.