Sənaye və energetika

Azərbaycan yeni neft-qaz emalı və neft-kimya kompleksinin inşasına 13 mlrd. dollar sərmayə yatıracaq

09 iyun 2011 12:18 (UTC +04:00)

«APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) strateji inkişaf üzrə vitse-prezidenti Tofiq Qəhrəmanov bildirib.

T.Qəhrəmanov qeyd edib ki, kompleksin ümumi sahəsi 1500 hektar təşkil edəcək və Bakıdan 60 km məsafədə yerləşəcək.

«İlkin olaraq yeni tikiləcək zavodda ildə 10-15 mlrd. kubmetr həcmində qaz və 10 mln. ton neft emal olunacaq. Eyni zamanda, burada A-92, A-95 və A-98 markalı benzin, reaktiv mühərrik yanacağı, dizel, bitum və s. istehsal ediləcək və bunun xeyli hissəsi ixrac olunacaq» », - deyə T.Qəhrəmanov bildirib.

ARDNŞ rəsmisinin sözlərinə görə, buradakı məhsullar «Euro-5» standartının tələblərinə cavab verəcək: «Neft məhsullarının əsas hissəsi dizel olacaq ki, ölkəyə dizel ilə işləyən qənaətcil avtomobilləri daha çox idxal etmək mümkün olacaq».

Neft-kimya kompleksində istehsal olunacaq məhsullarından və burada istifadə olunacaq müasir avadanlıqlardan danışan T.Qəhrəmanov bildirib ki, ümumiyyətlə kompleksin istifadəyə verilməsi mərhələli şəkildə aparılacaq və 2018-2020-ci illəri əhatə edir. «İlkin olaraq neft-kimya kompleksi, daha sonra neft-qaz emalı kompleksi istifadəyə veriləcək», - deyə ARDNŞ rəsmisi vurğulayıb.

T.Qəhrəmanov əlavə edib ki, bu layihənin ümumi kapital qoyuluşu 12-13 mlrd. ABŞ dolları təşkil edir və onun icrasından sonra 6 il sərmayələr özünü doğruldacaq. Bu layihənin icrasına xarici investorların da cəlb edilməsi planlaşdırılır.