Sənaye və energetika

“Nabucco” konsorsiumu: “Azərbaycanın qərarını nikbinliklə gözləyirik”

10 iyun 2011 12:04 (UTC +04:00)

Bakı. Viktoriya Dementyeva - APA-Economics. “Bu ilin sonunadək “Nabucco” layihəsi üçün qaz təchizatçıları ilə razılaşmalar əldə etməyə ümid edirik. Azərbaycanın qərarını isə nikbinliklə gözləyirik”. “APA-ECONOMICS”in xəbərinə görə, bu barədə “Nabucco Gas Pipeline International” şirkətinin ictimaiyyətlə əlaqələr şöbəsinin rəhbəri Kristian Dolezal bildirib.

Onun sözlərinə görə, Azərbaycan öz qazının Avropa bazarına çıxarılması üçün böyük potensiala malikdir: “Bunun üçün də Azərbaycana buraxılış gücü böyük olan irimiqyaslı kəmər layihəsi lazımdır. Bunun üçün müvafiq digər layihələr də var və mən onları pisləmək istəməzdim. Amma qeyd etmək istərdim ki, yalnız “Nabucco” bağlanmış müqavilələr əsasında Türkiyə ərazisi vasitəsilə təhlükəsiz tranzit rejimi təklif edir. Bu isə layihəni daha cəlbedici edir”.

K.Dolezal Xəzər qazının Avropaya nəqlini nəzərdə tutan ITGI kimi digər enerji layihələri ilə müqayisədə “Nabucco”nun üstünlüklərini də açıqlayıb: “Nabucco”nun təklif etdiyi çoxsaylı üstünlükləri digər layihələr təklif edə bilmir. Nisbətən kiçik miqyaslı bu layihələrin reallaşması üçün öncə “Nabucco”nun reallaşdırılması lazımdır. Bu layihəni gerçəkləşdirməklə qazın Avstriya və Balkanlar vasitəsilə İtaliya və Yunanıstana nəqli asan olacaq”.

Ekspertlərin fikrincə, AGRI və ITGI layihələrinin dəyəri və miqyası kiçik olduğundan, onların gerçəkləşməsi “Nabucco” ilə müqayisədə daha real görünür. K.Dolezal isə bunu ağlabatan iqtisadi arqument kimi dəyərləndirmir: “Təbii ki, irimiqyaslı layihəyə daha çox sərmayə qoymaq lazımdır. Lakin mənfəət də daha çox olacaq. Ona görə də “Nabucco” variantı daha sərfəlidir”.

K.Dolezal iyunun 8-də Türkiyənin Kayseri şəhərində imzalanmış “Nabucco”ya dair sazişi yüksək qiymətləndirdiyini vurğulayıb: “Bu, 5 ölkə və “Nabucco” konsorsiumu tərəfindən imzalanmış, layihənin hüquqi aspektlərini tənzimləyən çox mühüm sazişdir. Eyni zamanda həm də Azərbaycan üçün yaxşı xəbərdir. Azərbaycan “Nabucco” vasitəsilə öz qazını istehlakçı bazarına çıxara bilər”.

Xatırladaq ki, “Nabucco” qaz kəməri Xəzər regionundan təbii qazın Rusiyadan yan keçməklə Azərbaycan, Gürcüstan, Türkiyə, Bolqarıstan, Macarıstan, Rumıniya və Avstriya vasitəsilə Mərkəzi Avropaya ixracı üçün nəzərdə tutulub. Bu məqsədlə yaradılan “Nabucco Gas Pipeline İnternational GmbH.” konsorsiumuna OMV (Avstriya), MOL (Macarıstan), “Transgaz” (Rumıniya), “Bulgargaz” (Bolqarıstan), “BOTAŞ” (Türkiyə) və RWE (Almaniya) şirkətləri qoşulub.

Tikintisinə 2012-ci ildə başlanacaq «Nabucco» qaz kəməri ilə Azərbaycan qazının nəqli 2017-ci ildən gözlənilir. Nəqletmə gücü ildə 31 mlrd. kubmetr olan kəmərlə Azərbaycanla yanaşı, Türkmənistan və İraq qazı da daşınacaq. Layihənin dəyərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək.

İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq.