Sənaye və energetika

Özbəkistan Azərbaycandan qazma qurğusu alıb

14 iyun 2011 09:25 (UTC +04:00)

Bakı. Nicat Mustafayev - APA-Economics. Özbəkistan Azərbaycanın «Azneftmaş» ASC-dən «Ruslan UP 130/170» qazma qurğusunu alıb.

ASC-dən «APA-Economics»ə verilən məlumata görə, ötən ilin noyabr ayının əvvəlində Azərbaycan İqtisadi İnkişaf Nazirliyinin təşkilatçılığı ilə Daşkənddə (Özbəkistan) keçirilən Azərbaycanın İlk Milli Sərgisində bir sıra Azərbaycan müəssisələrinin məhsulları ilə yanaşı, «Azneftmaş» ASC-nin məhsulları da nümayiş olunub. Sərgidə nümayiş edilməsi üçün müəssisənin istehsal etdiyi «Ruslan UP 130/170» qazma qurğusu Özbəkistan neftçiləri və sərgini ziyarət edənlər tərəfindən maraqla qarşılanıb. Sərgi çərçivəsində «Azneftmaş» ASC-nin nümayəndələri bir sıra işgüzar görüşlər keçirib və MDB məkanında analoqu olmayan bu qazma qurğusu artıq Özbəkistan neftçilərinə satılıb.

Qeyd edək ki, 3 800 metr dərinlikdə qazma işləri apara bilən qurğu «Allison» avtomatik transmissiyası və Almaniya istehsalı olan «Caterpillar» mühərriki ilə təchiz olunub. Qazma qurğusu vasitəsilə 6 800 metr dərinlikdə əsaslı təmir, 8 000 metr dərinlikdə isə cari təmir işlərini həyata keçirmək mümkündür. Dizel mühərriki ilə işləyən qurğunun maksimal gücü 500 a.q. (N=364 KVt) təşkil edir. «Ruslan UP 130/170» qazma qurğusu 130 ton nominal, 170 ton qısamüddətli yükqaldırma qabiliyyətinə malikdir, vışkasının hündürlüyü 34,6 metrdir.

Xatırladaq ki, 1999-cu ildən Mingəçevirdə fəaliyyət göstərən «Azneftmaş» ASC əsasən, neft və qaz mədənlərinin istismarında istifadə olunan maşın və avadanlıqlar istehsal edir. Müəssisədə həmçinin, 50-170 tonluq qazma qurğuları, qazma vışkası və özül, bütün ölçülərdə siyirtmələr, fontan armaturları, kalon başlıqları, sementləyici aqreqat, porşenli nasoslar istehsal olunur. “Azneftmaş” ASC-nin avadanlıqları Rusiya, Özbəkistan, Türkmənistan, Qazaxıstan, Ukrayna kimi ölkələrdə tanınır. «Azneftmaş» ASC Türkmənistanın «Türkmənneft», «Türkmənqaz» və «Türkməngeologiya» birlikləri ilə sıx əməkdaşlıq edir və bu ölkəyə ildə təqribən 15-20 mln. ABŞ dolları həcmində avadanlıq ixrac edir.