Sənaye və energetika

Bakıda səmt qazının utilizasiyasına həsr olunmuş beynəlxalq konfrans keçirilir

17 iyun 2011 09:15 (UTC +04:00)

Bakı. Vahab Rzayev - APA-Economics. Azərbaycanda Dövlət Neft Şirkəti (ARDNŞ) və Dünya Bankının təşkilatçılığı ilə Bakıda “Səmt qazın yandırılmasının azaldılması və utilizasiyası üzrə Azərbaycan təcrübəsi” mövzusunda beynəlxalq konfrans keçirilib.

“APA-Economics”in məlumatına görə, konfransı açıq elan edən ARDNŞ-in Ekologiya üzrə vitse-prezidenti Rəfiqə Hüseynzadə iştirakçılara şirkətin prezidenti Rövnəq Abdullayevin təbrik məktubunu oxuyub.

R.Abdullayev məktubunda qeyd edib ki, sənaye istehsalının sürətli artımı zamanı ekologiya məsələləri dövlətin diqqət mərkəzində olan prioritet məsələlərdən biridir və bu sahədə ARDNŞ Səmt Qazının Yandırılmasının Azaldılması üzrə Qlobal Tərəfdaşlıq (GGFR) çərçivəsində Dünya Bankı ilə 2008-ci ildən əməkdaşlıq edir. Hazırda şirkət tərəfindən qazın yandırılmasının və iqlim dəyişikliyinə təsirinin azaldılması istiqamətində strategiya təsdiqlənib və müvafiq tədbirlər görülür.

Konfransda çıxış edən Dünya Bankının Bakı ofisinin rəhbəri Cozef Ouen məlumat verib ki, GGFR-ə artıq 30-a yaxın dövlət və transmilli şirkətlər qoşulub, o cümlədən Azərbaycan da ən fəal iştirakçılardan biridir. Onun sözlərinə görə, təcrübə göstərir ki, hökumət bu prosesdə fəal iştirak edir və şirkətlər üçün stimullaşdırıcı tədbirlər görürsə, səmt qazın yandırılmasının azaldılması prosesi həmin ölkələrdə daha səmərəli gedir: “Prosesin son məqsədi yandırılan qazın həcminin azaldılması və səmt qazının daha səmərəli istifadəsidir”.

ARDNŞ-in Ekologiya idarəsinin rəis müavini Əflatun Həsənov şirkət tərəfindən səmt qazının atmosferi çirkləndirməsinin azaldılması istiqamətində görülən və görüləcək işlərdən danışıb: “ARDNŞ tərəfindən tullantıların idarə edilməsi, atmosferə atılan səmt qazının azaldılması və iqlim dəyişməsinə təsirin azaldılması üzrə müvafiq iş planları hazırlanıb və həyata keçirilir. Nəticədə səmt qazının tullantıların 2007-ci ildə 0,5 mlrd. kubmetr təşkil edibsə, 2010-cu ildə bu göstərici 0,29 mlrd. kubmetrə endirilib. Ümumi məqsəd isə bu tullantıların 2015-ci ilə qədər mümkün qədər minimuma endirməkdir”.

Qeyd edək ki, dünyada hər il təxminən 150 mlrd. kubmetr səmt qazı yandırılır ki, bu da 30-35 mlrd. dollar həcmində itki deməkdir. Tullantılar sahəsində ölkələr arasında lider Rusiyadır və onun payına təxminən 50 mlrd. kubmetr yandırılan səmt qazı düşür. Bundan başqa, Nigeriya, İran, Liviya, Çin, Venesuela və ABŞ-da da böyük göstəricilər müşahidə olunur.

Kanada, Norveç, Rusiya, Qazaxıstan və digər ölkələrin mütəxəssislərin iştirakı keçirilən konfransda səmt qazının yandırılmasının azaldılması, onun səmərəli istifadəsi, karbon qazının atmosferə buraxılmasının azaldılması sahəsində məruzələr dinlənilib və müzakirələr aparılıb.