Sənaye və energetika

Ana səhifə

Azərbaycan «Azəri-Çıraq-Günəşli» yataqlar blokundan 11 mln. kubmetrədək səmt qazı alıb

22 avqust 2011 14:50 (UTC +04:00)

Bakı. Nicat Mustafayev – APA-Economics. Bu ilin yanvar-iyun ayları ərzində «BP Azerbaijan» şirkəti Azərbaycan Dövlət Neft Şirkətinə (ARDNŞ) «Azəri-Çıraq-Günəşli» (AÇG) yataqlar blokundan gündə təxminən 10,5 mln. kubmetr səmt qazı verib. Bu barədə «APA-Economics»ə «BP Azerbaijan» şirkətindən bildirilib.

Şirkətin məlumatına əsasən, cari ilin ilk yarısı ərzində ARDNŞ-a 1,9 mlrd. kubmetr AÇG səmt qazı təhvil verilib: «Bütün il ərzində isə bu rəqəmin 2,3 mlrd. kubmetrə çatacağı proqnozlaşdırılır».

Qeyd edək ki, AÇG yatağının operatoru olaraq «BP Azerbaijan» şirkəti 2011-ci ilin birinci yarısı ərzində üç platformadan («Mərkəzi Azəri», «Qərbi Azəri» və «Şərqi Azəri») səmt qazını 28 düym ölçülü sualtı qaz kəməri vasitəsilə Səngəçal terminalına və oradan da Azərbaycanın daxili istifadəsi üçün «Azəriqaz» dövlət qaz şəbəkəsinə göndərməkdə davam edib. «Çıraq» platformasında hasil edilmiş səmt qazının bir hissəsi isə mövcud 16” ölçülü sualtı qaz boru kəməri vasitəsilə ARDNŞ-ın «Neft Daşları»ndakı kompressor stansiyasına göndərilib.

AÇG platformalarından hasil edilən səmt qazının qalan hissəsi təzyiqi saxlamaq məqsədilə yenidən kollektora vurulmaq üçün yataqdaxili sualtı qaz boru kəmərləri vasitəsilə «Mərkəzi Azəri»dəki kompressor və suvurma platformasına göndərilib. Hazırda «Mərkəzi Azəri»də 5 quyudan laya qaz vurma əməliyyatları davam edir.