Sənaye və energetika

Ana səhifə

«Şahdəniz-II» layihəsi üzrə qazın nəqli üçün tarif təklifi oktyabrın 1-dək konsorsiuma təqdim olunacaq

24 avqust 2011 08:54 (UTC +04:00)

Bakı. Nicat Mustafayev – APA-Economics. Bu ilin oktyabrın 1-dək Xəzərin Azərbaycan sektorunda yerləşən «Şahdəniz» qaz yatağının işlənməsi layihəsinin ikinci mərhələsi çərçivəsində qazın nəqli üçün tarif təklifi və bununla bağlı şərtlər və müddəalar, eləcə də layihələrin daha geniş aspektlərini əhatə edən müfəssəl məlumatları özündə əks etdirməli olan təklif sənədlərinin konsorsiuma təqdim olunacağı gözlənilir. Bu barədə «APA-Economics»ə «BP-Azerbaijan» şirkətindən bildirilib.

Şirkətin məlumatına əsasən, «Şahdəniz»in tammiqyaslı işlənməsi yeni cənub qaz dəhlizi vasitəsilə Azərbaycan qazını Avropaya və Türkiyəyə çatdırmaqla Avropa bazarlarının qaz təchizatını və enerji mənbələrinin müxtəlifliyini artırmaq məqsədi daşıyan nəhəng bir layihədir: «Bu layihənin birinci mərhələsində olan ildə təqribən 9 mlrd. kubmetr qaza ildə 16 mlrd. kubmetr qaz əlavə edəcəyi nəzərdə tutulur. «Şahdəniz»in tammiqyaslı işlənməsi dünyanın ən böyük qaz işlənməsi layihələrindən biridir, yeni Cənub Dəhlizi isə Avropa qaz idxalının təhlükəsizliyi və çoxşaxəliliyini əsaslı şəkildə artıracaq».

Şirkətdən həmçinin bildirilib ki, ilk qazın 2017-ci ildə əldə edilməsini təmin etmək üçün layihə üzrə mühəndis-layihə işləri irəliyə doğru gedir.

«İndiki planlara görə, «Şahdəniz»in tammiqyaslı işlənməsi konsepsiyasına körpü ilə birləşdirilmiş iki yeni platforma, 2 yarımdalma qazma qurğusundan qazılacaq 26 sualtı quyu, suyun 550 metrədək dərinliyində 500 km uzunluğunda sualtı boru kəməri şəbəkəsi, Azərbaycan və Gürcüstan ərazilərində yeni boru kəməri və kompressor vasitəsilə ildə 16 mlrd. kubmetr əlavə qaz ixracı gücünün əldə olunması və Səngəçal terminalının genişləndirilməsi daxildir», - deyə «BP-Azerbaijan» şirkətindən qeyd olunub.

Planlara həmçinin, tammiqyaslı işlənmə qazını Gürcüstan-Türkiyə sərhədinə layihənin özü çatdıracağı, qazın Türkiyə ərazisindən Avropa bazarlarına nəqli üçün ya Türkiyənin mövcud infrastrukturundan, ya da yeni boru kəməri infrastrukturundan istifadə olunacağı daxildir: «Layihə hazırda bütün variantları qiymətləndirmək üzərində işləyir».

«Bu ilin avqustun 10-da Azərbaycan Dövlət Neft Şirkəti (ARDNŞ) «Şahdəniz» ixrac danışıqları qrupunun rəhbəri kimi «Şahdəniz» qazının Avropaya nəqli üçün Avropa İttifaqının üç əsas perspektiv boru kəməri qrupuna öz təkliflərini təqdim etmək dəvəti və məlumat üçün sorğu göndərdiyini elan edib. Bu perspektiv qruplar ITGI (Türkiyə, Yunanıstan və İtaliya), Trans Adriatik qaz kəməri (Trans Adriatic Pipeline - TAP) və «Nabucco»dur», - deyə şirkətdən bildirilib.

«Şahdəniz» bu sənədlərdə boru kəməri qruplarından onların layihələrini qiymətləndirmək və ixrac həlli üçün qərar qəbul etməkdən ötrü tələb olunan məlumatların konsorsiuma təqdim olunmasını xahiş edib. Qazın nəqli üçün tarif təklifi və bununla bağlı şərtlər və müddəalar, eləcə də layihələrin daha geniş aspektlərini əhatə edən müfəssəl məlumatları özündə əks etdirməli olan təklif sənədlərinin konsorsiuma təqdim olunmasının son tarixi oktyabrın 1-i müəyyənləşdirilib», - deyə «BP-Azerbaijan»dan bildirilib.

Xatırladaq ki, «Şahdəniz» yatağın ehtiyatları 1,2 trln. kubmetr həcmində qiymətləndirilir və hazırda «Şahdəniz» yatağında hasilat 4 quyudan aparılır. Layihənin iştirakçıları isə BP (əsas operator - 25,5%), «Statoil» (kommersiya operatoru - 25,5%), ARDNŞ (10%), «LUKoil» (10%), NICO (10%), «Total» (10%) və TPAO (9%) şirkətləridir.