Sənaye və energetika

Ana səhifə

Xəzər dənizinin Azərbaycan sektorunda külək parkı tikiləcək

01 sentyabr 2011 11:07 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan Sənaye və Energetika Nazirliyinin müraciəti əsasında Avropa Komissiyasının «INOGATE» proqramı çərçivəsində hazırlanmış «Azərbaycanın Xəzər dənizi ərazisində külək enerji potensialının öyrənilməsi Layihəsi»nin yekun hesabatının təqdimatı keçirilib.

«APA-Economics»in məlumatına görə, tədbirdə çıxış edən Sənaye və Energetika Nazirliyi investisiya və sənaye obyektlərinin yenidən qurulması şöbəsinin müdiri Ramiz Rzayev layihə barədə ətraflı məlumat verib, əsas istiqamətləri barədə danışıb. O, bildirib ki, Azərbaycanda karbohidrogen ehtiyatlarının kifayət qədər olmasına baxmayaraq, hazırda ölkədə alternativ və bərpa olunan enerjidən istifadə sahəsinə böyük diqqət yetirilir və dəstək verilir: «Artıq ölkədə alternativ enerji mənbələrindən istifadə olunur. Bu sahənin inkişafı ölkədə enerji təhlükəsizliyini artıracaq, eyni zamanda təbii sərvətlərə qənaət edilməsinə şərait yaradacaq».

R.Rzayev onu da bildirib ki, Azərbaycanda, əsasən də Abşeron yarımadasında külək potensialı genişdir: «Günəş və su elektrik stansiyaları üçün də geniş şərait və imkanlar mövcuddur».

Tədbir zamanı layihənin xarici mütəxəssisləri Kim Yansen və Yesper Tisen təqdimatla çıxış ediblər və bildiriblər ki, layihə çərçivəsində gələcəkdə Xəzər dənizində külək parklarının yaradılması daxildir.

Qeyd edək ki, ötən il icrasına başlanan layihə gələn il başa çatacaq. Layihənin məqsədi Xəzər dənizində enerji potensialının müəyyənləşdirilməsidir. Layihə Avropa Komissiyası tərəfindən maliyyələşdirilir.