Sənaye və energetika

Ana səhifə

Azərbaycanın «Abşeron» qaz strukturunda kəşfiyyat işləri genişləndirilir

12 sentyabr 2011 10:43 (UTC +04:00)

Bakı. Nicat Mustafayev – APA-Economics. Azərbaycan Dövlət Neft Şirkəti (ARDNŞ) Xəzərin Azərbaycan sektorunda yerləşən «Abşeron» strukturunda Girməki lay dəstəsində kəşfiyyat işləri aparmağı nəzərdə tutur. «APA-Economics»in məlumatına görə, bunu ARDNŞ-ın birinci vitse-prezidenti Xoşbəxt Yusifzadə bildirib.

Onun sözlərinə görə, 2009-cu ilin fevralın 27-də ARDNŞ, Fransanın «Total E& Absheron B.V.» şirkəti və ARDNŞ-ın Ortaq Neft Şirkəti arasında «Abşeron» strukturu üzrə imzalanmış Hasilatın Pay Bölgüsü sazişinə uyğun olaraq, 3 illik kəşfiyyat müddəti ərzində saziş sahəsində Fasilə lay dəstəsinə layihə dərinliyi 6 600 metr olan 1 quyunun qazılması nəzərdə tutulmuşdur: «Əlavə kəşfiyyat müddəti - 3 il ərzində layihə dərinliyi 6 600 metrə qədər və layihə horizontu Fasilə olan 2 quyu qazılmalıdır».

X.Yusifzadə onu da əlavə edib ki, 2011-ci ilin yanvarın 14-də Heydər Əliyev adına Yarımdalma Qazma Qurğusu ilə dənizin 473,5 metr olan dərinliyində qazma işlərinə başlanılıb, layihə dərinliyi 7 200 metr, layihə horizontu Qala lay dəstəsidir: «Bu ilin sentyabrın 1-də quyunun dərinliyi 6 568 metrə çatdırılıb. Quyuda aparılmış geofiziki tədqiqat işlərinin nəticəsi müsbət qiymətləndirilib. Fasilə lay dəstəsi və Balaxanı lay dəstəsinin VIII horizontu karbohidrogenlə doymuş hesab olunur. Quyuda qum laylarının ümumi effektiv qalınlığı 150 metrə çatır. Hazırda quyuya qoruyucu kəmərin buraxılması üçün işlər aparılır».

X.Yusifzadə onu da bildirib ki, «Abşeron» strukturunda Girməki lay dəstəsində də kəşfiyyat işlərinin aparılması nəzərdə tutulur: «Təzyiq çox olmasa çalışacağıq ki, Girməki lay dəstəsində də kəşfiyyat işlərini aparaq və ehtiyatları hesablayaq».

Qeyd edək ki, ötən həftə Fransanın «Total» enerji şirkəti Xəzərin Azərbaycan sektorunda yerləşən «Abşeron» strukturunda iri qaz yatağı aşkar edildiyini açıqlayıb. «Abşeron» strukturu Bakıdan 100 km cənub-şərqdə, təqribən 6 558 metr dərinlikdə yerləşir. «Abşeron» yatağı Azərbaycan geoloqları tərəfindən ötən əsrin 60-cı illərində kəşf edilib. Strukturdan il qazın çıxarılması 2020-2022-ci illərdə nəzərdə tutulur ki, qazma nöqtəsində platforma inşa olunarsa ilk hasilata 5 il öncə başlanıla bilər. Strukturun karbohidrogen ehtiyatları 350 mlrd. kubmetr qaz və 45 mln. ton kondensat həcmində qiymətləndirilir.

Xatırladaq ki, «Total» şirkətinin törəmə qurumu olan «Total EP Apşeron» (40%) bu strukturun işlənməsi layihəsində ARDNŞ (40%) və «GDF SUEZ» şirkətləri (20%) ilə birgə iştirak edir.