Sənaye və energetika

Ana səhifə

DEPA-nın icraçı direktoru: “ITGI layihəsi Azərbaycan hökuməti üçün etibarlı tərəfdaşdır”

24 yanvar 2012 13:07 (UTC +04:00)

ITGI (Interconnector Turkey-Greece-Italy) layihəsinin mətbuat ofisindən “APA-Economics”ə verilən xəbərə görə, Nabucco ilə bağlı daha əminliyini ifadə edən Elio Rugeri “Cənub dəhlizi” üçün daha kiçik boru kəməri seçimləri üzrə şərhçilərin yenilənmiş rəylərinə münasibət bildirib.

“ITGI davam edən kommersiya təklifləri üzrə tezliklə “Şahdəniz” layihəsinin ikinci fazası çərçivəsində qaz əldə etmək üçün tikinti işlərinə başlamağa icazə verən səlahiyyətlər və icazələrlə ən qabaqcıl “Cənub dəhlizi” layihəsidir. İtaliyanı hədəfə almış digər “Cənub dəhlizi” layihələri isə hələ ilkin mərhələdədir və onların tamamlanması üçün əhəmiyyətli dərəcədə zaman tələb olunur” - deyə E.Rugeri qeyd edib.

Onun sözlərinə görə, Türkiyə-Yunanıstan sərhədindən başlayan ITGI layihəsi Azərbaycan qazını Türkiyə vasitəsilə, o cümlədən TANAP (Trans-Anatolian Pipeline) vasitəsilə nəql etmək üçün istənilən tələbə tam olaraq cavab verir.

“IGI Poseidon”un sədri və Yunanıstanın DEPA Dövlət Qaz Korporasiyasının icraçı direktoru Harri Saçinis deyib ki, ITGI texniki baxımdan nəzərdə tutulan smeta xərclərinin icrasına görə yüksək əminliyə malik olan ən qabaqcıl layihədir: “Bu gün böyük kəmər dəstəkləməyə imkan yoxdur. “Şahdəniz 2” çərçivəsində əldə ediləcək qazın həcmi ITGI-nin tutumuna uyğun gələn 10 mlrd. kubmetrdir”.

ITGI-ni Azərbaycan hökuməti üçün etibarlı tərəfdaş adlandıran H.Saçinis qeyd edib ki, bu layihə Avropanın təchizat mənbələrinin diversifikasiyası və təbii qazı Avropa bazarlarına mümkün qədər tez çatdırmaq üçün alternativ strateji dəhlizin inkişafı üçün israrlı tələblərə uyğun gəlir: “ITGI Azərbaycan qazının daha çox resursların diversifikasiyasına ehtiyacı olan Cənub-Şərqi Asiyaya, Bolqarıstana və digər yerlərə çatdırılması üçün yeganə real yol olan IGB vasitəsilə şərait yaradır”.

Qeyd edək ki, ITGI boru kəməri sisteminə IGI (Interconnector Greece-İtaly), ITG (Interconnector Turkey-Greece) və IGB (Interconnector Greece-Bulgaria) aiddir. İtaliyanın “Edison” və Yunanıstanın DEPA şirkətlərinin birgə layihəsi olan ITGI qaz boru kəməri vasitəsilə Azərbaycan qazı İtaliya və Yunanıstana nəql olunur. Hazırda layihə çərçivəsində 1 mlrd. kub metr qaz ixrac olunur. İtaliya və Bolqarıstan arasında 150 km uzunluğunda yeni qaz boru kəməri inşa edildikdən sonra İtaliya ildə 10 mlrd. kubmetr, Yunanıstan 1 mlrd. kubmetr, Bolqarıstan isə 1-3 mlrd. kubmetr qaz alacaq.