Sənaye və energetika

Ana səhifə

Azərbaycanın şimal-qərb bölgəsinə təbii qazın verilməsində fasilə yaranıb

17 fevral 2012 07:23 (UTC +04:00)

Zaqatala. Vüqar Heydərov - APA. Azərbaycanın şimal-qərb bölgəsinə təbii qazın verilməsində fasilə yaranıb. Bu barədə APA-nın Şəki-Zaqatala bürosuna yerli sakinlər məlumat verib.

Onların sözlərinə görə, bu gün səhər saat 09:00 radələrindən ölkənin şimal-qərb bölgəsinə (Qax, Zaqatala və Balakən) təbii qazın verilməsi dayanıb. Zaqatala Qaz İstismarı Sahəsində (QİS) bölgəyə təbii qazın verilməsinin dayandırılması faktını təsdiqləyiblər. Buna səbəb olaraq Yevlax-Balakən magistral qaz kəmərinin 110-cu km-liyində (Zaqatala rayonu ərazisində) qaz sızmalarının aşkar edilməsi göstərilir. Bu üzdən bölgənin 3 rayonuna təbii qazın verilməsində müvəqqəti fasilə yaranıb.

Hazırda Ağdaş Magistral Qaz Kəmərləri İdarəsinin əməkdaşları magistral qaz kəmərində baş vermiş qaz sızmalarının aradan qaldırılması istiqamətində təmir işlərinə başlayıb. Günün sonuna kimi təmir işlərinin başa çatdırılması və bölgəyə təbii qazın verilməsinin bərpa ediləcəyi bildirilir.

ARDNŞ-dən APA-ya verilən məlumata görə, cari təmir işlərinin aparılması ilə əlaqədar bu gün saat 10:00-dan 18:00-dək “Yevlax-Balakən” magistral qaz kəmərində təbii qaz təchizatı dayandırılacaq. Təmir işləri zamanı Qax, Zaqatala və Balakən rayonlarına mavi yanacağın verilişində fasilələr yaranacaq.