Sənaye və energetika

Ana səhifə

Natiq Əliyev: “TANAP layihəsinə heç kim mane ola bilməz”

13 oktyabr 2012 08:30 (UTC +04:00)

“APA-Economics”in xəbərinə görə, bunu Azərbaycanın sənaye və energetika naziri Türkiyənin “Ticarət və Siyasət” jurnalına müsahibəsində bildirib.

O, bəzi dövlətlərin layihə ilə bağlı mənfi mövqedə olmasının əsassız olduğunu vurğulayıb: “Biz Türkiyə və Azərbaycan olaraq bu layihəni həyata keçirəcəyik və heç kimdən də heç nə istəmirik. Bu layihədə narahatlığa səbəb olacaq heç bir şey yoxdur”.

Nazir Natiq Əliyev Türkiyənin artan təbii qaz ehtiyacını 6 mlrd. kubmetr həcmdə təmin edən layihə ilə ilkin mərhələdə Avropaya da 10 mlrd. kubmetr qazın satılacağını deyib. O, TANAP kəmərinin “Nabucco”ya alternativ deyil, ona uyğun layihə olduğunu bildirib.

Natiq Əliyev Azərbaycan Dövlət Neft Şirkətinin 2017-ci ilin sonuna qədər Türkiyəyə “Petkim” və TANAP kəməri layihəsi ilə birlikdə 17 mlrd. dollarlıq investisiya yatıracağını söyləyib: “Bu rəqəm Türkiyədəki ən böyük birbaşa investisiya miqdarıdır”.

Xatırladaq ki, bu il iyunun 26-da İstanbulda Azərbaycan və Türkiyə arasında TANAP layihəsi üzrə saziş imzalanıb. Beş il ərzində reallaşması nəzərdə tutulan layihə 7 mlrd. ABŞ dollarına başa gələcək. Boru kəmərinin diametri 56 düym və ya 1,4 metr nəzərdə tutulub. Boru xəttinin inşaat işləri 2015-ci ildə başlayacaq, ilk qaz 2018-ci ildə dünya bazarına çıxarılacaq. Dörd mərhələdə həyata keçiriləcək layihənin ilk mərhələsi 2018-ci ildə başa çatacaq, 2020-ci ildə kəmərin buraxılış qabiliyyəti ildə 16 mlrd. kubmetrə, 2023-cü ildə 23 mlrd. kubmetrə, 2026-cı ildə isə 31 mlrd. kubmetrə çatdırılacaq. İlk dövrdə TANAP kəməri ilə nəql olunacaq 16 mlrd. kubmetr Azərbaycan qazının 10 mlrd. kubmetri Avropaya, 6 mlrd. kubmetri isə Türkiyəyə satılacaq. Avropa üçün nəzərdə tutulan qaz Türkiyə-Bolqarıstan və ya Türkiyə-Yunanıstan sərhədində təhvil veriləcək.