Sənaye və energetika

Ana səhifə

Astara rayonunun iki yaşayış məntəqəsi təbii qazla təmin olunub

23 oktyabr 2012 15:15 (UTC +04:00)

Astara. Ağəddin Babayev - APA. Bu gün Astaranın iki yaşayış məntəqəsi ilk dəfə təbii qazla təchiz olunub. APA-nın cənub bürosunun məlumatına görə, rayon mərkəzindən 15 km aralıda yerləşən Şovaş və Şiyətük kəndlərinə mavi yanacağın verilməsi yerli sakinlər üçün bayram hədiyyəsi olub.

Açılış mərasimində çıxış edən yerli ictimaiyyətin nümayəndələri, ziyalılar və ağsaqqallar onların sosial rifah halının yaxşılaşdırılması istiqamətində həyata keçirilən layihələrə görə ölkə başçısına minnətdarlıqlarını çatdırıblar. Qeyd olunub ki, mavi yanacağın olmaması qış aylarında əhalinin, xüsusilə qadınların bir sıra çətinliklərlə üzləşməsinə səbəb olub. Evlərin əsasən odun sobalarından istifadə edilməklə qızdırılması meşələrin qırılması ilə nəticələnib.

İlkin mərhələdə Şovaş və Siyatük kəndlərində 158 yaşayış evində təbii qaz xəttinin çəkilişi başa çatdırılıb. Bütün ailələr sayğaclarla pulsuz təmin edilib.

Astara Rayon Qaz İstismar Sahəsinin rəisi Zahir Rzayevin APA-nın yerli bürosuna verdiyi məlumata görə, rayonda gələn ilin sonuna kimi 5000-ə qədər abunəçini əhatə edən 15 kəndin qazlaşdırılması məqsədilə irimiqyaslı işlər görülür. Hazırda rayonun Kakalos, Pensər, Kolatan, Şiyəkəran kəndlərində qazlaşdırılmamış evlərin qaz təchizatının bərpası davam etdirilir. Ümumilikdə isə Astara şəhəri, bir qəsəbə və 27 kənd daxil olmaqla rayonda 11 300-ə yaxın abonent təbii qazdan istifadə edir.