Sənaye və energetika

Ana səhifə

Akademik Yusif Məmmədəliyevin xatirə muzeyi istifadəyə verilib - FOTOSESSİYA

Akademik Yusif Məmmədəliyevin xatirə muzeyi istifadəyə verilib - <font color=red>FOTOSESSİYA</font>

24 oktyabr 2012 11:34 (UTC +04:00)

Bakı - APA-Economics. AMEA-nın Neft-Kimya Prosesləri İnstitutunda görkəmli alim, neft-kimya elminin banilərindən biri akademik Yusif Məmmədəliyevin xatirə muzeyi əsaslı təmirdən sonra istifadəyə verilib

“APA-Economics”in xəbərinə görə, bu münasibətlə keçirilmiş tədbirdə mədəniyyət və turizm naziri Əbülfəz Qarayev, AMEA prezidenti Mahmud Kərimov, ARDNŞ prezidenti Rövnəq Abdullayev, eləcə də ölkənin elmi və mədəni ictimaiyyətinin çoxsaylı nümayəndələri iştirak edib.

Tədbir iştirakçıları alimin iş kabineti əsasında təşkil olunmuş muzeyə baxış keçirib, burada aparılmış əsaslı təmir işlərindən sonra yaradılan şəraitlə tanış olublar. Bildirilib ki, akademik Y.H.Məmmədəliyevin xatirə muzeyi hələ 1985-ci ildə, görkəmli alimin 80 illik yubileyi ilə əlaqədar olaraq açılıb. Bu illər ərzində baxımsız vəziyyətə düşən muzeyin təmiri ilə əlaqədar işləri ARDNŞ öz üzərinə götürüb və cari ilin iyun ayından etibarən əsaslı təmir-bərpa işlərinə başlanılıb, tam şəkildə təmir olunub, ən yeni texnologiyalarla təchiz edilərək istifadəyə verilib. Muzeyin yeni dizaynı müasir standartlara cavab verir. Muzey iki bölmədən ibarətdir. Birinci bölmədə alimin həyat və yaradıcılığını əks etdirən çoxsaylı fotolar, akademikin yazı masası, kitab şkafı, şəxsi əşyaları yerləşdirilib. Burada alimin həyat fəaliyyəti və elmi yaradıcılığı haqqında hazırlanmış video materiallar xüsusi tele-lövhələrdə təqdim olunur. Xüsusi texnologiyalarla hazırlanmış ayrı bir stenddə akademikin şəxsi fotoaparatı ilə çəkilmiş şəkillərdən hazırlanmış elektron fotoalbom yer alıb. İkinci bölmədə isə alimin elmi yaradıcılığı illərində neft-kimya sahəsində əldə etdiyi uğurları əks etdirən stendlər yerləşdirilib. Bundan başqa, ikinci bölmədə akademikin raket yanacağının ixtira hüququnu təsdiqləyən patentləşdirmə sənədi, orden və medalları, Dövlət Mükafatı laureatının döş nişanı yerləşdirilib.

Tədbirdə iştirak edən akademikin qızı Sevda Məmmədəliyeva ailəsi adından kabinet-muzeyin təmir olunmasında əməyi keçən hər kəsə, xüsusilə ARDNŞ rəhbərliyinə öz minnətdarlığını bildirib.